ەكولوگيا مينيسترلىگىنە قاراستى 8 قىزمەتكەر جەمقورلىق بويىنشا سوتتالدى - انتيكور
استانا. KAZINFORM - سىبايلاس جەمقورلىققا قارسى ءىس-قيمىل اگەنتتىگى Kazinform ساۋالىنا جولداعان جاۋاپتا ەكولوگيا جانە تابيعي رەسۋرستار مينيسترلىگىنىڭ قىزمەتكەرلەرى اراسىنداعى سىبايلاس جەمقورلىق كورسەتكىشتەرى تۋرالى مالىمەت بەردى.
ەسكە سالساق، «بوكەيوردا» مەملەكەتتىك تابيعي رەزەرۆاتىنىڭ باس ديرەكتورى جەمقورلىق بويىنشا كۇدىككە ىلىنگەنى ءمالىم بولعان.
وسىعان وراي سىبايلاس جەمقورلىققا قارسى ءىس-قيمىل اگەنتتىگىنەن ەكولوگيا جانە تابيعي رەسۋرستار مينيسترلىگى قىزمەتكەرلەرىنىڭ اراسىنداعى جەمقورلىق كورسەتكىشى تۋرالى مالىمەت سۇراتتىق.
- اگەنتتىك 2024 -جىلى مينيسترلىكتىڭ جانە ونىڭ اۋماقتىق بولىمشەلەرىنىڭ قىزمەتشىلەرىنە قاتىستى 15 سىبايلاس جەمقورلىق قىلمىستى تىركەدى. ولاردى جاساۋدا 9 ادام اشكەرەلەندى، ونىڭ ىشىندە 8 ادام سوتتالدى. اياقتالعان قىلمىستىق ىستەر بويىنشا بەلگىلەنگەن زالال - 167,3 ميلليون تەڭگە، ونىڭ 45 ميلليون تەڭگەسى وتەلدى، - دەپ جازىلعان جاۋاپتا.
اگەنتتىك 2024 -جىلى جەمقورلىقتىڭ الدىن الۋ ماقساتىمەن «ەرتىس ورمانى» جانە «سەمەي ورمانى» تابيعي رەزەرۆاتتارىنداعى سىبايلاس جەمقورلىق تاۋەكەلدەرىنە سىرتقى تالداۋ جۇرگىزگەن.
- تالداۋ ناتيجەلەرى بويىنشا مينيسترلىكپەن بىرلەسىپ، ورمان جانە تابيعي رەسۋرستاردى باسقارۋدا انىقتالعان جۇيەلىك سىبايلاس جەمقورلىق تاۋەكەلدەرىن جويۋعا باعىتتالعان جول كارتاسى ازىرلەنىپ، بەكىتىلدى. سونداي-اق، بيىلعى 21-ساۋىردە اگەنتتىك الاڭىندا ەكولوگيا سالاسىنداعى سىبايلاس جەمقورلىق تاۋەكەلدەرىن جويۋ ماسەلەلەرى بويىنشا ۆەدومستۆوارالىق كەڭەس ءوتىپ، ورمان شارۋاشىلىعى مەن تابيعي رەزەرۆاتتاردا انىقتالعان جۇيەلىك ماسەلەلەر مەن سىبايلاس جەمقورلىق تاۋەكەلدەرىنە ەرەكشە نازار اۋدارىلدى. ناتيجەسىندە، مينيسترلىككە جانە ونىڭ قۇرىلىمدىق بولىمشەلەرىندە سىبايلاس جەمقورلىق تاۋەكەلدەرىنە ىشكى تالداۋ جۇرگىزۋ بويىنشا ۇسىنىستار بەرىلدى، - دەپ جازادى انتيكور ماماندارى.
