ەكولوگيا ءمينيسترى ورمانشىلاردىڭ جالاقىسىن كوتەرۋگە قاتىستى تۇسىنىك بەردى

استانا. KAZINFORM - ورمان ءورت ءسوندىرۋ ستانتسيالارىنىڭ بارلىق قىزمەتكەرلەرىنە 100 پايىز قوسىمشا اقى تولەۋ ماقساتىندا ۇكىمەت قاۋلىسىنىڭ جوباسى ازىرلەندى. بۇل تۋرالى پارلامەنت ماجىلىسىندە ورماندى قورعاۋ تاقىرىبىنا ارنالعان ۇكىمەت ساعاتىندا ق ر ەكولوگيا جانە تابيعي رەسۋرستار ءمينيسترى ەرلان نىسانبايەۆ ايتتى.

«الەۋمەتتىك ماسەلەنى شەشۋ اياسىندا بىلتىر 1- شىلدەدەن باستاپ مەملەكەتتىك ورمان كۇزەتى قىزمەتكەرلەرىنە لاۋازىمدىق ەڭبەكاقىنىڭ 100 پايىز مولشەرىندە قوسىمشا اقى تولەۋ بەلگىلەندى. مەملەكەتتىك ورمان كۇزەتى قىزمەتكەرلەرىنىڭ ورتاشا جالاقىسى 129 مىڭنان 250 مىڭ تەڭگەگە دەيىن ۇلعايدى»، - دەدى ە. نىسانبايەۆ.

ونىڭ اتۋىنشا، قالعان قىزمەتكەرلەرگە (ەكونوميستەر، بۋحگالتەرلەر جانە ورمان ءورت ءسوندىرۋ ستانتسيالارىنىڭ قىزمەتكەرلەرى: تراكتورشىلار، جۇرگىزۋشىلەر، ورمان ءورت سوندىرۋشىلەرى، راديست-تەلەفونشىلار) مينيسترلىك پەن كاسىپوداق اراسىنداعى كەلىسىم شەڭبەرىندە وتكەن جىلى 75 پايىز قوسىمشا اقى قاراستىرىلدى.

«سونىمەن قاتار، ورمان ءورت ءسوندىرۋ ستانتسيالارىنىڭ بارلىق قىزمەتكەرلەرىنە 100 پايىز قوسىمشا اقى تولەۋ ماقساتىندا ۇكىمەت قاۋلىسىنىڭ جوباسى ازىرلەندى. جوبا ۋاكىلەتتى ورگاندارمەن الدىن الا كەلىسىلدى»، - دەدى مينيستر.