ەكولوگيا ءمينيسترى كيىك ەتىنىڭ ساپاسى تۋرالى: ەشقانداي كۇمان بولماۋ كەرەك

استانا. KAZINFORM - ەكولوگيا جانە تابيعي رەسۋرستار ءمينيسترى ەرلان نىسانبايەۆ ۇكىمەت ۇيىندەگى باسپا ءسوز ءماسليحاتىندا كيىك ەتىنەن ءتۇرلى اۋرۋلار تارايتىنى تۋرالى پىكىرلەرگە جاۋاپ بەردى.

- كيىك ۇشاسىن سەرتيفيكاتى بار كومبيناتتارعا عانا وتكىزەمىز. ول جەردە سانيتاريالىق-ەپيدەميولوگيالىق باقىلاۋ ورگاندارىنىڭ ماماندارى بۇكىل پروتسەدۋرانى قاداعالايدى. تىرشىلىك ورتاسىنان باستاپ اتۋعا دەيىنگى ەپيزوتيكالىق جاعدايى زەردەلەنەدى. بۇدان كەيىن ەتى مەن قانىنا ءتۇرلى اۋرۋلار بويىنشا تالداۋ جاسالادى. وسىدان كەيىن عانا ەت ساتۋعا شىعارىلادى. بۇل جەردە ەت ساپاسىنا بايلانىستى ەشقانداي كۇمان بولماۋ كەرەك، - دەدى مينيستر.

ونىڭ سوزىنشە، ساتۋعا شىعارىلعان ەتتىڭ ءبارى سانيتارلىق جانە ۆەتەرينارلىق تەكسەرۋدەن وتەدى.

- ەگەر كيىك ەتى جول بويىندا، تىستا ساتىلعان بولسا تۇسىنەر ەدىم. قازىر ەتتىڭ ساتۋعا ارنالماعان جەردە ساۋدالانعانىن ەلەستەتە دە المايمىن. ءتيىستى قىزمەتتەر ونى قاتاڭ قاداعالايدى. وندايعا جول جوق، مەن جاۋاپكەرشىلىكپەن مالىمدەي الام، - دەدى ەرلان نىسانبايەۆ.

ەسكە سالساق، اۋىل شارۋاشىلىعى مينيسترلىگى دە كيىك ەتىنەن اۋرۋلار تارايتىنى تۋرالى مالىمدەمەلەرگە رەسمي تۇسىنىكتەمە بەرگەن بولاتىن.

اۆتور

ەسىمجان ناقتىباي