كولۋمبيانىڭ ەكس-پرەزيدەنتىنە قاتىستى قىلمىستىق ءىس قوزعالدى
استانا. KAZINFORM - كولۋمبيانىڭ ەكس-پرەزيدەنتى الۆارو ۋريبە 29 -شىلدەدە سوتتتا كۋاگەرگە قىسىم جاساعانى ءۇشىن كىنالى دەپ تانىلدى. بوگوتا سوتى ەكس- پرەزيدەنتتىڭ تۇرمەدە وتىرعان بۇرىنعى ساربازدى جالعان كۋالىك بەرۋگە يتەرمەلەگەنىن انىقتادى، دەپ حابارلايدى DW.
ۋريبە كولۋمبيانى 2002- 2010 -جىلدار ارالىعىندا باسقارعان.
سوتتىڭ مالىمدەۋىنشە، ەكس-پرەزيدەنت اسكەري توپتارمەن بايلانىسى تۋرالى تەرگەۋدە بۇرىنعى ميليتاريست دجۋان گيلەرمو مونسالۆەنى وزىنە قارسى كۋالىك بەرمەۋگە ماجبۇرلەگەن.
بۇل كولۋمبيا تاريحىنداعى العاشقى جايت بولىپ وتىر. بۇرىن-سوڭدى ەكس-پرەزيدەنتكە قىلمىس جاساعانى ءۇشىن ايىپ تاعىلماعان. ۋريبە 12 جىلعا دەيىن باس بوستاندىعىنان ايىرىلۋى مۇمكىن.
وقيعا قالاي باستالعان؟
قىلمىستىق ءىس 2012 -جىلى كونسەرۆاتيۆتى ساياساتكەر ۋريبە سولشىل سەناتور يۆان چەپەدانى زاڭسىز قارۋلى توپتارمەن بايلانىسى بار دەپ ايىپتاعان كەزدە باستالدى. الايدا جوعارعى سوت چەپەدانى ەمەس، ۋريبەنىڭ ءوزىن تەرگەۋگە شەشىم قابىلدادى.
رەسمي تەرگەۋ 2018 -جىلى باستالىپ، 2019 -جىلى مىڭداعان ادام بوگوتا مەن مەدەلليندە ۋريبەگە قارسى قىلمىستىق ءىستىڭ اشىلۋىنا قارسى دەمونستراتسياعا شىقتى.
دەگەنمەن، ءىس بيىل، 2024 -جىلى قايتا اشىلدى. بۇل لۋز كامارگونى پرەزيدەنت گۋستاۆو پەترو (كولۋمبيا تاريحىنداعى ءبىرىنشى سولشىل پرەزيدەنت) باس پروكۋرور ەتىپ تاعايىنداعاننان كەيىن بولدى. پەترونىڭ ءوزى بۇرىنعى پارتيزان جانە ۋريبەنىڭ ساياسي قارسىلاسى ەكەنىن ايتا كەتەيىك.
ۋريبەنىڭ وتكەنى مەن بەدەلى
الۆارو ۋريبە كولۋمبياداعى ۇزاققا سوزىلعان ازاماتتىق سوعىس كەزىندە بيلىكتە وتىرعان. ول سولشىل FARC بۇلىكشىلەر توبىنا جانە ەسىرتكى كارتەلدەرىنە قارسى قاتال ساياساتىمەن تانىمال بولدى. ونىڭ ورنىنا پرەزيدەنتتىككە كەلگەن، بۇرىنعى وداقتاسى حۋان مانۋەل سانتوس 2016 -جىلى FARC - پەن بىتىمگەرشىلىك كەلىسىمگە قول قويدى، ۋريبە مۇنى «ساتقىندىق» دەپ باعالادى.
ەكس- پرەزيدەنت قازىر دە كولۋمبياداعى كونسەرۆاتورلار اراسىندا تانىمال ساياساتكەر سانالادى. ول پرەزيدەنت پەترو ۇكىمەتىنىڭ قارۋلى توپتارمەن بەيبىتشىلىك ارەكەتى ءساتسىز اياقتالعاننان كەيىن پوزيتسياسىن كۇشەيتىپ الدى.
الۆاروعا قاتىستى باسقا دا اۋىر تەرگەۋلەر ءجۇرىپ جاتىر. اتاپ ايتقاندا، ول 1997 -جىلى انتيوحيا گۋبەرناتورى بولعان كەزدە بولعان اۋىل تۇرعىندارىنىڭ قىرعىنىنا قاتىستى تەرگەلۋدە. سونداي-اق ارگەنتينالىقتار ۋريبە اسكەريلەرىنىڭ 6 مىڭنان استام بەيبىت تۇرعىندى ءولتىرىپ، جوعالىپ كەتۋىنە سەبەپ بولعانى ءۇشىن شاعىمدانعان. ۋريبە وزىنە قارسى تەرگەۋدى «ساياسي كەك» دەپ اتايدى.
ا ق ش مەملەكەتتىك حاتشىسى ماركو رۋبيو سوت ۇكىمىن سىناپ، ۋريبەنىڭ جالعىز قىلمىسى - ەلىن قورعاپ، ادال قىزمەت ەتكەنىن ايتتى.
- كولۋمبيانىڭ سوت جۇيەسىن راديكالدى سۋديالاردىڭ قارۋ رەتىندە پايدالانىپ جاتقانى الاڭداتادى، - دەدى رۋبيو.
اۆتور
بەگابات ۇزاقوۆ
