كولۋمبياداعى كوشكىن سالدارىنان مەرت بولعاندار سانى 22 ادامعا جەتتى
استانا. قازاقپارات – 24-ماۋسىمدا كولۋمبيانىڭ مەدەلين قالاسىندا قاتتى جاۋىن-شاشىننان كەيىن بولعان كوشكىن سالدارىنان قازا تاپقاندار سانى 22 ادامعا جەتتى، دەپ جازادى انادولى.
تاعى 8 ادام ءىز-ءتۇزسىز جوعالعاندار قاتارىندا.
انتوكيا دەپارتامەنتى گۋبەرناتورى اكىمشىلىگىنىڭ مالىمەتىنشە، جاڭبىردان كەيىن كوشكىن جۇرگەن بەلو مەن التوس-دە-وريەنتە اۋداندارىنان جاڭا مايىتتەر تابىلعان.
مالىمدەمەدە قۇتقارۋ جۇمىستارى 390 نان استام ماماننىڭ قاتىسۋىمەن جالعاسىپ جاتقانى اتاپ وتىلگەن. قۇتقارۋشىلار ءۇيىندى استىندا قالعانداردى شىعارۋ ءۇشىن بار كۇشىن سالىپ جاتىر.
سونداي-اق، بۇل اۋدانداعى كوپتەگەن ءۇي وپىرىلۋ ءقاۋپى جوعارى بەتكەيلەردە سالىنعاندىقتان، اسا قاۋىپتى ايماقتا ورنالاسقانى ايتىلعان.
بۇدان بۇرىن حابارلانعانداي، قاتتى جانە تولاسسىز جاۋعان جاڭبىر مەن وزەندەردىڭ جوعارعى اعىسىنان كەلگەن سۋ كولەمىنىڭ ارتۋى سالدارىنان قىتايدىڭ وڭتۇستىك-باتىسىنداعى گۋيچجوۋ پروۆينتسياسىنىڭ ەكى ۋەزىندە كۇشتى سۋ تاسقىنى بولدى. تابيعي اپات سالدارىنان التى ادام قازا تاپتى.
