كولۋمبيادا ۇشاق اپاتىنان 10 ادام قازا تاپتى
استانا. KAZINFORM - كولۋمبيانىڭ سولتۇستىك- باتىسىندا جەڭىل ۇشاق اپاتقا ۇشىراپ، كەم دەگەندە 10 ادام قازا تاپتى. بۇل تۋرالى جۇما كۇنى انتتوكيا دەپارتامەنتى تاۋەكەلدەردى باسقارۋ بيۋروسىنىڭ ديرەكتورى كارلوس ريوس پۋەرتا مالىمدەدى، دەپ حابارلايدى Kazinform سينحۋا اقپارات اگەنتتىگىنە سىلتەمە جاساپ.
سارسەنبى كۇنى جوعالىپ كەتكەن Pacifica Travel كومپانياسىنىڭ ۇشاعى كولۋمبيانىڭ سولتۇستىك- باتىسىنداعى انتوكيا دەپارتامەنتىنىڭ اۋىلدىق جەرىندە اپاتقا ۇشىرادى. ونىڭ بورتىندا ەكيپاجدىڭ ەكى مۇشەسى مەن سەگىز جولاۋشى بولعان.
- وكىنىشكە وراي، ءتىرى قالعاندار جوق. وقيعا ورنىندا 37 قىزمەتكەر جۇمىس ىستەپ جاتىر جانە ءبىز ادامداردىڭ دەنەلەرىن الىپ شىعۋ جانە سوت پوليتسياسىمەن ۇلەستىرۋدى قامتيتىن ەكىنشى كەزەڭدى جەدەلدەتىپ جاتىرمىز، - دەدى ك. ريوس پۋەرتا.
ونىڭ ايتۋىنشا، قۇلاعان ۇشاقتان ادام دەنەلەرىن الىپ شىعۋ پروتسەسى اۋا رايىنىڭ قولايسىزدىعىنا بايلانىستى تىكۇشاقتاردى پايدالانۋ مۇمكىن بولماۋى قيىنداتىپ وتىر.
- ءبىز بۇل پروتسەستى بارىنشا جىلدام جانە ءتيىمدى ەتۋ ءۇشىن جۇمىس ىستەپ جاتىرمىز، - دەپ قوستى شەنەۋنىك.
كولۋمبيانىڭ كولىك مينيسترلىگى مەن ازاماتتىق اۆياتسيا باسقارماسى قازا تاپقانداردىڭ وتباسىلارىنا كوڭىل ايتتى. اپاتتىڭ سەبەپتەرىن انىقتاۋ جۇمىستارى باستالدى.
وسىعان دەيىن وڭتۇستىككورەيالىق Boeing تىڭ جازۋ قۇرىلعىلارى اپاتقا 4 مينۋت قالعاندا توقتاپ قالعانىن جازدىق.
