كوللەدج ستۋدەنتتەرى «اقىلدى جىلىجاي» پروتوتيپىن ويلاپ تاپتى
استانا. KAZINFORM - الماتى قۇرىلىس- تەحنيكالىق كوللەدجىنىڭ 3-كۋرس ستۋدەنتتەرى عابباس بايازيتوۆ، گەورگي شيكين، نازيم اليەۆ اۆتوماتتاندىرۋ ۇدەرىستەرى، سەنسورلىق باقىلاۋ جانە جاساندى ينتەللەكت ەلەمەنتتەرى بىرىكتىرىلگەن «اقىلدى جىلىجاي» پروتوتيپىن ويلاپ تاپتى. بۇل تۋرالى وقۋ-اعارتۋ مينيسترلىگىنىڭ باسپا ءسوز قىزمەتى حابارلادى.
IoT قۇرىلعىلارى مەن باعدارلامالىق جاساقتامانىڭ ينتەگراتسياسىنىڭ ارقاسىندا جىلىجاي ميكروكليماتتى، جارىقتاندىرۋ مەن سۋارۋدى وزدىگىنەن رەتتەي الادى. جوبا وسىمدىكتەردى ءوسىرۋ تيىمدىلىگىن ارتتىرۋعا جانە ونى كۇتىپ-باپتاۋعا ادامنىڭ ارالاسۋىن بارىنشا ازايتۋعا باعىتتالعان.
ايتا كەتۋ كەرەك، جاساندى ينتەللەكتىنى پايدالانۋ دەرەكتەردى تالداۋعا، وسىمدىكتەردىڭ قاجەتتىلىكتەرىن بولجاۋعا جانە جاعدايلاردى ناقتى ۋاقىتتا بەيىمدەۋگە مۇمكىندىك بەرەدى.
- بۇل جوبا ستۋدەنتتەردىڭ يننوۆاتسياعا دەگەن ۇمتىلىسىنىڭ ناتيجەسى. وندىرىستىك وقىتۋ شەبەرلەرىنىڭ جەتەكشىلىگىمەن ستۋدەنتتەر وزدەرىنىڭ تەحنيكالىق دايارلىقتارى مەن ينجەنەرلىك ويلاۋ قابىلەتتەرىنىڭ جوعارى دەڭگەيىن كورسەتتى. جوبانى جاساۋ بارىسىندا ولار مۇنداي جۇيەگە دەگەن سۇرانىستى تالداپ، اگروتەحنيكا مەن تسيفرلاندىرۋ سالاسىنداعى زاماناۋي تەحنولوگيالاردى زەرتتەپ، جىلىجايدىڭ جۇمىسىن وڭتايلاندىرۋ ءۇشىن ماشينالىق وقىتۋ الگوريتمدەرىن ەنگىزدى، - دەيدى جوبا جەتەكشىسى شەرنياز كابدۋشيەۆ.
ەنەرگوۇنەمدىلىك پەن جۇيەنىڭ تۇراقتىلىعىنا ەرەكشە ءمان بەرلىگەن، جىلىجاي كۇن پانەلدەرىمەن جابدىقتالعان، ال باعدارلامالىق قامتاماسىز ەتۋ جۇيەسى ينتەرنەتكە شەكتەۋلى قولجەتىمدىلىك جاعدايىندا دا جۇمىس ىستەي الاتىنداي ەتىپ جاسالعان.
ستۋدەنتتەر جوبانى ودان ءارى دامىتۋدى جوسپارلاپ وتىر. الداعى ۋاقىتتا قاشىقتىقتان باقىلاۋعا ارنالعان موبيلدى قوسىمشا جاساپ، سەنسورلىق جۇيەنىڭ فۋنكتسيونالىن كەڭەيتۋ كوزدەلىپ وتىر.
ايتا كەتەلىك كوللەدجدە جاساندى ينتەللەكت زەرتحاناسى اشىلاتىنى تۋرالى جازعان ەدىك.
