كوللەدج ستۋدەنتتەرى الەمنىڭ 152 مەملەكەتىندە تانىلعان سەرتيفيكات الا الادى
استانا. KAZINFORM - جۇمىسشى ماماندىقتارى جىلى اياسىندا تەحنيكالىق جانە كاسىپتىك ءبىلىم الۋشىلاردىڭ كاسىبي داعدىلارىن تانۋدىڭ جاڭا قۇرالى ەنگىزىلۋدە، دەپ حابارلايدى ق ر وقۋ-اعارتۋ مينيسترلىگىنىڭ باسپا ءسوز قىزمەتى.
حالىقارالىق سەرتيفيكاتتاۋ جۇيەسى Certiport پلاتفورماسى نەگىزىندە ىسكە قوسىلىپ، قازىرگى تاڭدا پيلوتتىق رەجيمدە ەلىمىزدىڭ بەس كوللەدجىندە قولجەتىمدى. قازاقستانداعى العاشقى رەسمي تەستىلەۋ ورتالىعى (CATC) «Talap» ك ە ا ق بازاسىندا اشىلدى.
Certiport — بۇل سيفرلىق تەحنولوگيالار مەن كەڭسە باعدارلامالارى سالاسىندا كاسىبي سەرتيفيكاتتاۋعا باعىتتالعان حالىقارالىق پلاتفورما. ول ءبىلىم بەرۋ سالاسىنداعى الەمدىك كوشباسشىلاردىڭ ءبىرى — ۇلى بريتانيالىق Pearson كومپانياسىنىڭ قۇرامىنا كىرەدى.
Certiport سەرتيفيكاتتارى الەمنىڭ 152 ەلىندە تانىلعان، ولاردىڭ قاتارىندا - ا ق ش، كانادا، ەۋروپا، ازيا، اۆستراليا جانە تاياۋ شىعىس ەلدەرى بار.
بۇل قازاقستاندىق كوللەدج ستۋدەنتتەرىنىڭ ءوز داعدىلارىن حالىقارالىق ستاندارتتار بويىنشا دالەلدەپ، شەتەلدىك جۇمىس بەرۋشىلەر تاراپىنان تانىلۋىنا، شەتەلدە تاعىلىمدامادان ءوتىپ، جۇمىس تابۋدا ارتىقشىلىققا يە بولۋىنا جانە جاھاندىق ەڭبەك نارىعىنا شىعۋىنا مۇمكىندىك بەرەدى.
«قازىرگى تاڭدا كوللەدج تۇلەكتەرىنە تەك ديپلوم ەمەس، ناقتى داعدىلارىن راستاۋى دا قاجەت بولۋدا. حالىقارالىق سەرتيفيكاتتاۋ ولارعا قازاقستاندا دا، شەتەلدە دە جاڭا مانساپتىق مۇمكىندىكتەر اشادى»، - دەدى ق ر وقۋ-اعارتۋ مينيسترلىگىنىڭ تەحنيكالىق جانە كاسىپتىك ءبىلىم بەرۋ دەپارتامەنتىنىڭ ديرەكتورى اسەت مۇحانبەتوۆ.
اتالعان ەمتيحان سەسسياسى ASTANA POLYTECHNIC جوعارعى كوللەدجى بازاسىندا ءوتتى. ناتيجەسىندە ءتورت ستۋدەنت ءوز كاسىبي قۇزىرەتتەرىن راستاپ، حالىقارالىق سەرتيفيكاتتارعا يە بولدى. ولاردىڭ قاتارىندا كيبەرقاۋىپسىزدىك سالاسىنداعى IT ماماندار: دميتري كارپيۋك، ارسەني سىپلاكوۆ، راشيد حيسماتۋللين، سونداي-اق JavaScript بويىنشا IT مامان - ادەمى قابدوللا بار.
وسىعان دەيىن ءبىلىم بەرۋ جۇيەسىنە جاساندى ينتەللەكت قۇرالدارىن ەنگىزۋدىڭ ۇلتتىق ساياساتى ازىرلەنەتىنى تۋرالى جازدىق.
