كوكتەمگى سۋ تاسقىنى: 2,5 مىڭنان استام ءۇيدىڭ قۇرىلىسى اياقتالدى
استانا. KAZINFORM - بيىل ەلىمىزدىڭ ءبىرقاتار ءوڭىرىن تاسقىن سۋ باستى، بۇگىندە قۇزىرلى ورگاندار ونىڭ سالدارىن جويىپ، قالپىنا كەلتىرۋ جۇمىستارىن جالعاستىرىپ جاتىر.
«سۋ تاسقىنى ەلىمىزدىڭ 10 وڭىرىندە بولدى، ونىڭ سالدارىنان 224 ەلدى مەكەن، 17,603 تۇرعىن ۇيگە زاقىم كەلدى. بارلىق زاقىم كەلگەن شەككەن عيماراتتارعا تەحنيكالىق تەكسەرۋ جۇرگىزىلدى. ونىڭ قورىتىندىسى بويىنشا 9,156 ءۇي جوندەۋدەن وتكىزىلدى جانە 8,447 ءۇي قالپىنا كەلتىرۋگە جاراماي قالدى. وسىلايشا نارىقتان 5,767 ءۇي مەن پاتەر ساتىپ الىندى. سونىمەن قاتار 2,680 جاڭا ءۇيدىڭ قۇرىلىسى باستالدى. جاڭا ۇيلەردى سالۋ بارىسىندا تاسقىننىڭ الدىن الۋ ماقساتىندا جەرگىلىكتى جەردىڭ رەلەفتەرى مەن لاندشافتى ەسكەرىلدى. بۇگىندە 2,576 ءۇيدىڭ قۇرىلىسى اياقتالدى. قۇرىلىس جۇمىستارى مامىر ايىنىڭ سوڭىندا باستالىپ، 4 اي ىشىندە ءبىتتى»، - دەدى ونەركاسىپ جانە قۇرىلىس ءمينيسترى قانات شارلاپايەۆ ۇكىمەت وتىرىسىندا.
ايتا كەتسەك، قۇرىلىس جۇمىستارىنا سيفرلىق قۇرالدار ارقىلى كۇندەلىكتى مونيتورينگ جۇرگىزۋ ءۇشىن اتالعان مينيسترلىك جانىندا احۋالدىق ورتالىق قۇرىلدى.
«سونىمەن قاتار، قۇرىلىس جۇمىستارىنىڭ بارىسى مەن ساپاسىن باقىلاۋ ءۇشىن ءار وڭىردەگى قۇرىلىس الاڭدارىنا مينيسترلىكتىڭ جانە سۋ تاسقىنىنان زارداپ شەكپەگەن وڭىرلەردىڭ قىزمەتكەرلەرى ءىسساپارعا جىبەرىلدى. ەڭبەك جانە حالىقتى الەۋمەتتىك قورعاۋ مينيسترلىگىنىڭ «الەۋمەتتىك كومەك» اقپاراتتىق جۇيەسى زالالدى وتەۋ بويىنشا وتىنىشتەردى قابىلداۋ جانە ۇيىمداستىرۋعا ۇلەس قوستى. سيفرلىق دامۋ مينيسترلىگى موبيلدىك قوسىمشالار ارقىلى زالالدى وتەۋ ءوتىنىشىن بەرۋدى قىسقا ۋاقىتتا ۇيىمداستىرىپ، ءتيىستى قۇجاتتار بولماعان جاعدايدىڭ وزىندە ءوتىنىش بەرۋ مۇمكىندىگى قاراستىرىلدى»، - دەيدى ۆەدومستۆو باسشىسى.
توتەنشە جاعدايلار ءمينيسترى شىڭعىس ءارىنوۆ ۇكىمەت وتىرىسىندا تاسقىن بولعان ايماقتاردىڭ اپات سالدارىنا دايىن بولماي شىققانى جۇمىستاردى قيىنداتقانىن ءمالىم ەتتى.
«اقتوبە، اقمولا جانە سولتۇستىك قازاقستان وبلىستارىنداعى وزەندەردىڭ ارناسىنان اسىپ تاسۋىنا بايلانىستى قورعانىس مينيسترلىگىنىڭ پونتون كوپىرلەرىن ورناتۋ تالاپ ەتىلدى، بۇل حالىقتى دەر كەزىندە ەۆاكۋاتسيالاۋدى، ازىق-تۇلىك پەن ءدارى- دارمەك جەتكىزۋدى قامتاماسىز ەتۋ مۇمكىندىگىن بەردى.
زارداپ شەككەن ايماقتاردىڭ تاسقىن سۋدىڭ كولەمى مەن ولاردىڭ سالدارىنا دايىن ەمەستىگى اڭعارىلدى، ونداعى بىرلەسكەن ءىس- قيمىلداردى ۇيىمداستىرۋ مەن ۇيلەستىرۋ ءالسىز جۇرگىزىلدى»، - دەدى مينيستر.
سونداي- اق، ول مينيسترلىك كۇشىمەن گۋمانيتارلىق جۇكتەردى جەتكىزۋ، ەلەكتر قۋاتىمەن جابدىقتاۋدى جانە كولىك قاتىناسىن قالپىنا كەلتىرۋ ماسەلەلەرى جەدەل شەشىلدى دەپ ەسەپتەيتىنىن ايتادى.
«اپاتپەن ايانباي تاۋلىك بويى كۇرەسكەن قاراپايىم جاۋىنگەرلەر مەن قۇتقارۋشىلاردىڭ ارقاسىندا ادام ولىمىنە جول بەرىلمەي، بەس جۇزدەن استام ەلدى مەكەن سۋ باسۋدان امان قالدى»، - دەدى شىڭعىس ءارىنوۆ.
اۆتور
داۋلەت ىزتىلەۋ
