كوكجايلاۋ جانە جاڭا اسپالى جولدار: الماتى تاۋ كلاستەرى قالاي داميدى

الماتى. KAZINFORM - الەمنىڭ تۇكپىر-تۇكپىرىنەن تۋريستەر جينالاتىن توراپقا اينالعان الماتى تاۋ كلاستەرى قالاي دامىماق؟ Kazinform ءتىلشىسى انىقتاپ كوردى.

وتكەن جىلدىڭ 9 ايىندا الماتىعا 1,7 ميلليون تۋريست كەلگەن. ونىڭ 500 مىڭنان استامى شەتەلدىك ساياحاتشىلار.

مەگاپوليس ەلىمىزدەگى تۋريزم كورسەتكىشتەرى بويىنشا قانشا جىلدان بەرى الدا كەلەدى. وعان تۋريستەر ءۇشىن تارتىمدى الماتى تاۋ كلاستەرىنىڭ اسەرى بارى ءسوزسىز. وسى ورايدا، اگەنتتىك تۋريزم جانە سپورت مينيسترلىگىنە ايتىلعان ايماقتى ودان ءارى دامىتۋ جوسپارلارى جايلى ساۋال جولدادى.

ۆەدومستۆو جاۋابىنا سايكەس، قازىر الماتى تاۋ كلاستەرىن دامىتۋدىڭ 2025-2029 -جىلدارعا ارنالعان كەشەندى جوسپارى ازىرلەنىپ جاتىر. بۇل جوسپار شەڭبەرىندە اۋماقتىڭ تابيعي ەرەكشەلىكتەرىن ەسكەرە وتىرىپ جانە ەكوجۇيەلەردىڭ تۇتاستىعىن بۇزباي اسپالى جولداردى، تاۋ-شاڭعى تراسسالارىن سالۋ، كەمپينگتەر، ۆيزيت-ورتالىقتار، ەكولوگيالىق مارشرۋتتار مەن ناۆيگاتسيالىق ينفراقۇرىلىمدار قۇرۋ جوسپارلانادى.

- الماتى تاۋ كلاستەرىن قازاقستاندا العاشقى جىل بويى جۇمىس ىستەيتىن ءىرى تۋريستىك جوبا رەتىندە دامىتۋ - الماتىنىڭ حالىقارالىق تۋريزم ورتالىعى رەتىندەگى پوزيتسياسىن نىعايتۋداعى ماڭىزدى قادام بولادى، - دەلىنگەن تۋريزم جانە سپورت ءمينيسترىنىڭ ورىنباسارى ەرجان ەركىنبايەۆتىڭ جاۋابىندا.

تاۋلى ايماقتاعى تۋريزمدى دامىتۋدىڭ باسىم باعىتتاردىڭ ءبىرى - «شىمبۇلاق» جانە «Oi-Qaragai» تاۋ شاڭعىسى كۋرورتتارىن «قيماسار»، «بۋتاكوۆكا» شاتقالدارى ارقىلى اسپالى جولدارمەن جانە تاۋ شاڭعىسى تراسسالارىمەن قوسۋ بولماق.

- بيىل دايىندىق جۇمىستارى باستالادى. گەودەزيالىق جانە گەوتەحنيكالىق تالداۋ جۇرگىزۋ، اسپالى جولداردىڭ، تاۋ شاڭعىسى تراسسالارىنىڭ جانە باسقا دا ينجەنەرلىك ينفراقۇرىلىمنىڭ قۇرىلىسىن جوبالاۋ مەن رەكونسترۋكتسيالاۋدى قامتاماسىز ەتۋ ءۇشىن تەحنيكالىق- ەكونوميكالىق نەگىزدەمەنى، جوبالاۋ- سمەتالىق قۇجاتتامانى ازىرلەۋ جوسپارلانىپ وتىر، - دەپ جاۋاپ بەردى ۆيتسە-مينيستر.

ودان بولەك، تۋريزم جانە سپورت مينيسترلىگىنىڭ مالىمەتىنشە، الماتى تاۋ كلاستەرىندە ءتۋريزمدى دامىتۋ ءۇشىن ناۆيگاتسيالىق وبەكتىلەردى ورناتا وتىرىپ، جالپى ۇزىندىعى 100 شاقىرىم بولاتىن 10 تاۋ باعىتى قۇرىلاتىن بولادى. سونىمەن قاتار كۇن پانەلدەرىن ورناتا وتىرىپ، جەتۋى قيىن جەرلەردە ءۇش كەمپينگ-ايماق اشىلادى، «الما- اراسان» تەرمالدى بۇلاعى قايتا جاڭارتىلادى جانە فۋرمانوۆ شىڭىنىڭ ەتەگىنە اتكەنشەك ورناتىلادى.

- الماتى تاۋ كلاستەرىن دامىتۋدىڭ كەشەندى جوسپارىنا سايكەس رەسپۋبليكالىق جانە جەرگىلىكتى بيۋدجەتتەن قاراجات ءبولۋ، سونداي-اق جەكە ينۆەستيتسيالار تارتۋ كوزدەلگەن، - دەپ ءتۇسىندىردى ۆەدومستۆو.

«كوكجايلاۋدا» تاۋ كۋرورتى بولا ما؟

2014 -جىلى ۇكىمەتتىڭ قاۋلىسىمەن جالپى اۋماعى 1002 گەكتار ىلە الاتاۋى مەملەكەتتىك ۇلتتىق تابيعي پاركىنىڭ جەرى ايرىقشا قورعالاتىن تابيعي اۋماق ساناتىنان الماتى قالاسىنىڭ مەدەۋ اۋدانىنىڭ قورى ساناتىنا «كوكجايلاۋ» تاۋ شاڭعىسى كۋرورتىنىڭ قۇرىلىسى مەن جۇمىس ىستەۋى ءۇشىن بەرىلگەن بولاتىن.

2019 -جىلى قازان ايىندا پرەزيدەنت قاسىم-جومارت توقايەۆ جۇرتشىلىقتىڭ پىكىرىن ەسكەرە كەلىپ، «كوكجايلاۋ» شاتقالىندا تاۋ شاڭعىسى كۋرورتىن سالۋ جوباسىنا تىيىم سالعان ەدى.

ال 2022 -جىلى «كوكجايلاۋ» شاتقالى ىلە الاتاۋى ۇلتتىق پاركىنە قايتارىلدى.

تۋريزم جانە سپورت مينيسترلىگى الماتى تاۋ كلاستەرىن دامىتۋ جوسپارى اياسىندا كوكجايلاۋ تاۋ كۋرورتىنا قاتىستى قانداي شەشىم قابىلدانعانىن دا حابارلادى.

- قازىرگى ۋاقىتتا «كوكجايلاۋ» شاتقالىنداعى تاۋ كۋرورتىنىڭ تۇجىرىمداماسى مەن جوبالاۋ-سمەتالىق قۇجاتتاماسىن دايىنداۋ ءۇشىن قاجەتتى تالداۋ جۇمىسى جۇرگىزىلىپ جاتىر. جوبانى قارجىلاندىرۋ قارىز قاراجاتى ەسەبىنەن جۇزەگە اسىرىلاتىن بولادى، - دەپ حابارلادى مينيسترلىكتەن.

رەسمي جاۋاپقا سايكەس، «كوكجايلاۋ» جوباسىن قۇرىلىس جۇرەتىن اۋماقتى ەرەكشە قورعالاتىن تابيعي اۋماقتار قۇرامىنان، ياعني ىلە-الاتاۋ مەملەكەتتىك ۇلتتىق تابيعي پاركىنىڭ قۇرامىنان شىعارماي جۇزەگە اسىرۋ جوسپارلانىپ وتىر.

ودان بولەك ۆەدومستۆو جاڭا كۋرورت جوباسىنىڭ بىرنەشە جىل بۇرىنعى باستامادان قانداي ايىرماشىلىعى بار ەكەنىن ءتۇسىندىردى. اتاپ ايتقاندا، جوبانى ىسكە اسىرۋ جوعارى ەكولوگيالىق ستاندارتتاردى ساقتاۋ بويىنشا باسىمدىقپەن جۇزەگە اسىرىلاتىن بولادى جانە ءىس جۇزىندە تابىستى جوبالاردى ىسكە اسىرعانى بەلگىلى حالىقارالىق ساراپشىلار تارتىلادى. سونداي- اق قورشاعان ورتاعا تەرىس اسەردى بولدىرمايتىن زاماناۋي، ەميسسياسىز، شۋىلسىز جانە وزگە دە تەحنولوگيالار ەنگىزىلەدى. وعان قوسا، كۋرورتتىڭ جالپى اۋماعىنىڭ 2-3 پايىزدان اسپايتىن بولىگى عانا كوممەرتسيالىق ينفراقۇرىلىمعا، ياعني قوناق ءۇي، جالعا بەرۋ پۋنكتتەرى، دۇكەندەر ءۇشىن پايدالانىلادى.

- مەملەكەتتىك ۇلتتىق تابيعي پاركتىڭ (م ۇ ت پ) قورعاۋ ايماعىنىڭ اۋماعىندا كۋرورت سالۋدىڭ زاڭدىلىعى تۋرالى ماسەلەگە قاتىستى «ەرەكشە قورعالاتىن تابيعي اۋماقتار تۋرالى» ق ر زاڭىنىڭ 46-بابىنا سايكەس م ۇ ت پ جەر ۋچاسكەلەرى قولدانىستاعى ينفراقۇرىلىمى بار ايماقتارىندا تۋريستىك قىزمەتتى جۇزەگە اسىرۋ ءۇشىن، سونداي-اق جاڭا ينفراقۇرىلىم قۇرۋ ءۇشىن ءبىر جىلدان بەس جىلعا دەيىنگى مەرزىمگە قىسقا مەرزىمدى پايدالانۋعا جانە بەس جىلدان جيىرما بەس جىلعا دەيىنگى مەرزىمگە ۇزاق مەرزىمدى پايدالانۋعا بەرىلەدى، - دەپ حابارلادى مينيسترلىكتەن.

ەسكە سالايىق، بۇعان دەيىن كۇيگەنساي شاتقالىندا تۋريستەرگە ارنالعان جاڭا جاياۋ جۇرگىنشىلەر كوپىرى اشىلاتىنىن جازعانبىز.

اۆتور

دوسبول اتاجان