كوكشەتاۋدا سۋ باسقان ۇيلەردىڭ تۇرعىندارىن قۇتقارۋشىلار قايىقپەن جانە جاياۋ ارقالاپ شىعارىپ جاتىر
كوكشەتاۋ. KAZINFORM - كوكشەتاۋ قالاسىندا قىلشاقتى وزەنىنىڭ ارناسىنان اسىپ كەتۋىنە بايلانىستى 8 جەكە ءۇيدى سۋ باستى، سونداي- اق، 28 جەكە ءۇيدىڭ جانە 7 كوپقاباتتى تۇرعىن ءۇيدىڭ اۋلاسى سۋ استىندا قالدى.
اقمولا وبلىسى ت ج د باسپا ءسوز قىزمەتىنىڭ مالىمەتىنشە، قازىرگى ۋاقىتتا قىلشاقتى وزەنىنىڭ جاعالاۋىن نىعايتۋ جۇمىستارى جۇرگىزىلىپ جاتىر، ياعني 280 توننا ينەرتتى ماتەريال توسەلىپ، 150 م جاعالاۋ نىعايتىلدى. سونىمەن بىرگە 110 م كانال مەن ارىقتار كەڭەيتىلىپ، تەرەڭدەتىلدى. نىسانداردىڭ اينالاسىنا قۇم سالىنعان 310 قاپ توسەلدى، 1000 استام تەكشە مەتر سۋ سورىلدى.
سۋ باسۋ قاۋپى بار ۋچاسكەلەرىندە پوليتسيا جانە جەرگىلىكتى اتقارۋشى ورگانداردىڭ قىزمەتكەرلەرىنەن كەزەكشىلىك ۇيىمداستىرىلدى. سۋ تاسقىنىمەن كۇرەسۋ ءۇشىن ت ج د جەكە قۇرامنىڭ 59 ادام جانە 4 بىرلىك تەحنيكا، 9 موتوپومپا، ازاماتتىق قورعاۋ اكادەمياسىنان 63 ادام، 2 بىرلىك تەحنيكا، پ د جەكە قۇرامنان 7 ادام جانە 7 بىرلىك تەحنيكا، ج ا و 126 ادام، 64 بىرلىك تەحنيكا، 10 بىرلىك موتوپومپا جۇمىلدىرىلدى. بۇل باعىتتاعى جۇمىستار جالعاسىپ جاتىر.
ايتا كەتسەك، بۇدان بۇرىن كوكشەتاۋدا قىلشاقتى وزەنى ارناسىنان اسىپ، تەمىرجول ۆوكزالى ماڭىن سۋ باسقانىن جازعان ەدىك.
