كوك شاي مەن كوفە جۇرەك اۋرۋىنان ساقتايدى

كوك شاي مەن كوفەنى ءجيى ىشكەن ادامدا ينفاركت، ينسۋلت جانە وزگە دە جۇرەك-قان تامىرلارى اۋرۋلارىنا شالدىعۋ قاۋپى تومەن بولادى. مۇنداي عىلىمي جاڭالىقتى جاپوندىق عالىمدار اشىپ وتىر.

جاپونيانىڭ ەكى بىردەي مەديسينالىق ورتالىعى جۇرگىزگەن زەرتتەۋ 13 جىلعا سوزىلىپ، وعان 45-74 جاس ارالىعىنداعى 82 مىڭ ادام قاتىسقان.زەرتتەۋدى جۇرگىزگەن توكيو ۇلتتىق ونكولوگيالىق ورتالىعى مەن وساكاداعى سال جانە جۇرەك-قان تامىرلارى اۋرۋلارىن زەرتتەۋ ورتالىعىنىڭ ماماندارى. وسى ۋاقىت ارالىعىندا قاتىسۋشىلاردىڭ 3،5 مىڭعا جۋىعى اۋىر جۇرەك اۋرۋلارىنا شالدىعىپ، ميلارىنا قان قۇيىلىپتى.

الايدا، كۇنىنە ءبىر پيالا كوك شاي ىشكەن ادامداردا اۋىرۋ قاۋپى وزگەلەرگە قاراعاندا 22-35 پايىزعا تومەن بولعان. ال، اپتاسىنا 3-6 پيالا كوك شاي ىشەتىندەردە بۇل كورسەتكىش 11-20 پايىزعا تومەن.

جاپون عالىمدارىنىڭ پىكىرىنشە، كوك شاي قان تامىرلارىنىڭ قالىپتى دەڭگەيدە ساقتالۋىنا ىقپال ەتسە، كوفە قان قۇرامىنداعى قانتتى تومەندەتەدى.