كوفەگە قۇمار جاندار نەنى ەسكەرۋى ءتيىس - دارىگەر كەڭەسى

الماتى. KAZINFORM - كوفە - الەمدەگى ەڭ تانىمال سۋسىنداردىڭ ءبىرى. ونىڭ ۇستىنە كوپتەگەن ادام ءوز ءومىرىن تاڭعى حوش ءيىستى كوفەسىز ەلەستەتە دە المايدى. بۇل رەتتە الماتى قالالىق №36-ەمحانانىڭ دارىگەرى جانسايا ەسكەرمەس كوفە ءىشۋدىڭ پايداسى مەن زيانىن، سونداي-اق نازار اۋداراتىن جايتتاردى ايتىپ بەردى.

دارىگەر الدىمەن كوفەنىڭ ادام اعزاسى ءۇشىن پايدالى تۇستارى جايىندا ايتتى.

«كوفەنىڭ قۇرامىندا ادامنىڭ سەرگەك بولۋىنا كومەكتەسەتىن جانە قۋات دەڭگەيىن ارتتىراتىن كوفەين بار. ول ادامعا تاڭعى ۋاقىتتا نەمەسە فيزيكالىق نە پسيحيكالىق بەلسەندىلىگى ارتقان كەزدە پايدالى بولۋى مۇمكىن. سونداي-اق، كوفەدە انتيوكسيدانتتىڭ كوپ مولشەرى بار، ولار جاسۋشالاردى بوس راديكال اسەرىنەن زاقىمدانۋدان قورعاۋعا كومەكتەسەدى. كوفەنىڭ كەيبىر اۋرۋلارعا وڭ اسەرى بار، مىسالى، كەيبىر زەرتتەۋلەر بويىنشا كوفە ءىشۋ پاركينسون اۋرۋى، 2-ءتيپتى قانت ديابەتى، ءتىپتى كەيبىر قاتەرلى ىسىك ءتۇرىنىڭ دامۋ قاۋپىن ازايتۋى مۇمكىن»، - دەيدى دارىگەر.

ونىڭ ايتۋىنشا، كوفەنىڭ كەلەسىدەي زياندى تۇستارى بولۋى مۇمكىن.

«كوفەنى شامادان تىس تۇتىنۋ ۇيقىسىزدىقتى، جۇيكەنىڭ قوزۋى مەن الاڭداۋشىلىقتى تۋدىرۋى مۇمكىن. قان قىسىمى جوعارى ادامنىڭ كوفە ءىشۋى قان قىسىمىنىڭ ودان ءارى كوتەرىلۋىنە سەبەپ بولۋى مۇمكىن. جۇكتى ايەلدەرگە جۇكتىلىك كەزىندە كوفەنى كوپ مولشەردە ءىشۋ قۇرساقتاعى نارەستەنىڭ شالا تۋۋ قاۋپى تۋۋى مۇمكىن.

سونداي-اق، كوفەيندى شامادان تىس تۇتىنۋ مازاسىزدىق، جۇرەك پروبلەمالارى، اس قورىتۋ بۇزىلىستارى جانە ت. ب. ماسەلەلەرگە اكەلۋى مۇمكىن»، - دەپ اتاپ ءوتتى جانسايا ەسكەرمەس.

جۇرەك-قان تامىرلارى اۋرۋى بار ادامدار، جۇكتى ايەلدەر، ۇيقىسىزدىق نەمەسە مازاسىزدىقپەن اۋىراتىن ادامدار، بالالار كوفە ءىشۋدى شەكتەپ نەمەسە مۇلدەم باس تارتقانى ءجون.

كوفە ىشۋگە ەڭ قولايلى ۋاقىت - تاڭەرتەڭ نەمەسە كۇننىڭ العاشقى جارتىسى. تۇندە كوفەنى ءىشۋ ۇيقىعا كەدەرگى كەلتىرۋى مۇمكىن.

ءسوز سوڭىندا جانسايا ەسكەرمەس كوفە اۋەسقويلارى ءۇشىن ءبىرقاتار كەڭەس بەردى.

«كۇنىنە 400 م گ-نان ارتىق كوفەين تۇتىنباڭىز، ول شامامەن 4 كەسە. كوفە ۇيقىسىزدىقتى، جۇيكەنىڭ قوزۋىن نەمەسە باسقا جاعىمسىز بەلگىلەردى تۋدىراتىنىن بايقاساڭىز، تۇتىنۋدى شەكتەۋگە تىرىسىڭىز نەمەسە ودان تولىعىمەن باس تارتىڭىز. ادامدارعا كوفەين ءار ءتۇرلى اسەر ەتەدى، سوندىقتان ءوز سەزىمىڭىزدى باقىلاڭىز جانە سوعان بايلانىستى ىشەتىن كوفە مولشەرىن رەتتەڭىز. جالپى ايتقاندا، كوفەين مولشەرى مەن ءار ادامنىڭ جەكە ەرەكشەلىگىنە بايلانىستى كوفە اعزاعا پايدالى نە زياندى بولۋى مۇمكىن. تۇتىناتىن كوفەين مولشەرىن باقىلاپ، كوفە ىشكەن سوڭ ءوزىڭىزدىڭ جاعدايىڭىزعا نازار اۋدارۋ ماڭىزدى»، - دەدى دارىگەر جانسايا ەسكەرمەس.

اۆتور

دۋمان ارعىنگەلدى