كوشى-قون سالاسىنا تالداۋ جاساۋ قاجەت - ۇكىمەت باسشىسى
استانا. KAZINFORM - ۇكىمەت باسشىسى ولجاس بەكتەنوۆ زاڭسىز كوشى-قونعا قاتىستى جۇيەلى شەشىم قابىلداۋدى تاپسىردى.
- جاھاندىق گەوساياسي وزگەرىستەر مەن ميگراتسيالىق اعىننىڭ كۇشەيۋى جاعدايىندا حالىقتىڭ كوشى-قون ماسەلەسى اسا ماڭىزدى باسىمدىققا اينالىپ وتىر. مەملەكەت باسشىسىنىڭ تاپسىرماسىنا سايكەس، ناقتى رەتتەلەتىن كوشى-قون ساياساتىن قالىپتاستىرۋ كەرەك. ول ءۇشىن نورماتيۆتىك قۇقىقتىق بازاعا اۋديت جۇرگىزىپ، مەملەكەتتىك ورگانداردىڭ كوشى- قون سالاسىنداعى فۋنكتسيونالدىق مۇمكىندىكتەرىنە تالداۋ جاساۋ قاجەت، - دەدى ولجاس بەكتەنوۆ ۇكىمەت وتىرىسىندا.
سونداي-اق پرەمەر-مينيستر كوشى-قون سالاسىندا زاڭ بۇزۋ فاكتىلەرى بارىن ايتتى.
- زاڭسىز كوشى-قون، ءوڭىرارالىق ديسپروپورتسيا جانە كوشى-قون اعىنىن ءبىرىڭعاي ەسەپكە الۋدىڭ بولماۋى سياقتى بارلىق وزەكتى ماسەلە بويىنشا جۇيەلى ءارى كەشەندى شەشىم قابىلدانۋعا ءتيىس. سوڭعى 2 جىلدا قازاقستاندا تۇراقتى تۇراتىن شەتەلدىكتەردىڭ سانى ءبىر جارىم ەسە ارتقان، - دەيدى ول.
