كوشپەندىلەر ويىنىندا وۆاريدەن ولجا سالۋعا مۇمكىندىگىمىز بار - سەرىك اقتايەۆ

پاۆلودار. KAZINFORM - پاۆلودار وبلىسىنىڭ سپورتشىلارى V دۇنيەجۇزىلىك كوشپەندىلەر ويىنىندا اسىق اتۋ، وردو، وۆاري، قۇراش جانە ابا بويىنشا ەل نامىسىن قورعايدى.

جالپى وڭىردەن 7 سپورتشى جانە بىرنەشە تورەشى قاتىسادى دەپ كۇتىلىپ وتىر.

ەرتىس- بايان ءوڭىرىنىڭ سپورتشىلارى دۇنيەجۇزىلىك كوشپەندىلەر ويىنىنا بىلەك سىبانىپ دايىن وتىر. سپورتشىلار اسىق اتۋ، وردو (اسىق اتۋعا ۇقساس ويىن)، قۇراش (قىرعىز كۇرەسى)، ا ب ا (تۇركى كۇرەس ءتۇرى) جانە وۆاري بويىنشا سىنعا تۇسەدى.

اتاپ ايتقاندا، اقتايەۆ سەرىك پەن ەرنۇر مەرەشيەۆ وۆاريدان، جومارت نۇرلانوۆ پەن كەرىم جازدىقباي اسىق اتۋدان، سايات قيزات وردودان، ابا بويىنشا مۇحتار دالەلحان ۇلى، قۇراشتان التىناي نۇرحانوۆا جارىس جولىنا قوسىلادى.

توعىزقۇمالاقتان 3 دۇركىن الەم چەمپيونى، ق ر ەڭبەك سىڭىرگەن سپورت شەبەرى سەرىك اقتايەۆ وتاندىق ويىنشىلاردىڭ وۆاريدەن ولجا سالاتىن مۇمكىندىگى زور دەپ ەسەپتەيدى.

- وۆاريدى 2008 -جىلدان بەرى ويناپ كەلەمىن. وۆاري توعىزقۇمالاق تەكتەس ويىندارعا جاتادى. ويىن تاقتاسىندا 12 وتاۋ، 2 قازان، 48 تاس بولادى. نەگىزگى ماقساتى 25 تاس جيناپ، قارسىلاستى ۇتۋ. 24 تاستان شىقسا، تەڭ ويىن بولادى. قارسىلاستا ءجۇرىس تاۋسىلعان كەزدە ونى جۇرۋگە ماجبۇرلەۋ تاكتيكالارى دا قاراستىرىلعان. بۇل ويىن افريكا ەلدەرىنەن شىققان. بيىلعى جارىسقا الەمنىڭ ۇزدىك وۆاري ويىنشىلارى قاتىسادى، - دەدى سپورتشى Kazinform تىلشىسىنە بەرگەن سۇحباتىندا.

س. اقتايەۆ سوڭعى 16 جىلدا وۆاريدەن الەمدىك دەڭگەيدە وتكەن 24-حالىقارالىق جارىسقا قاتىسىپ، سونىڭ تەڭ جارتىسىندا جەڭىمپاز اتانعان. ال وزگەسىندە ۇزدىك ۇشتىكتەن تومەندەپ كورمەپتى. سپورتشى نەگىزگى ماقسات - 8-13-قىركۇيەك كۇندەرى استانا قالاسىندا وتەتىن دۇنيەجۇزىلىك كوشپەندىلەر ويىندارىندا ق ر قۇراما كومانداسى قاتارىندا بارىنشا ءتاۋىر ويىن ورنەگىن كورسەتۋ دەيدى ول.

ال قايىربايەۆ اتىنداعى ۇلتتىق كلۋبتىڭ ديرەكتورى دارحان جولامانوۆ ءوڭىرىمىزدىڭ سپورتشىلارى بابىندا ەكەنىن ايتادى.

اۆتور

مۇرات اياعان