كوشپەندىلەر ويىنىندا كوكپار قانداي ەرەجەمەن وتكىزىلىپ جاتىر

استانا. KAZINFORM - استانادا ءوتىپ جاتقان V دۇنيەجۇزىلىك كوشپەندىلەر ويىندارىنا باق سىناۋعا كەلگەن كوكپارشىلار بۇگىن شيرەك فينالدا ونەر كورسەتەدى.

جارىستار قازاقستان رەسپۋبليكاسىنىڭ كوكپار فەدەراتسياسىنىڭ ەرەجەلەرى بوي̆ىنشا وتكىزىلىپ جاتىر.

جارىسقا 18 جاستاعى جانە ودان اسقان سپورتشىلار جىبەرىلەدى. كوماندالاردىڭ كيىم ۇلگىلەرى بىردەي بولۋى كەرەك.

كوماندانىڭ قۇرامى: 12 سپورتشى، 1 باپكەر، 1 كوماندا جەتەكشىسى، 4 جىلقىشى، 1 مال دارىگەرى.

كوكپار الاڭى ەكى كومانداعا تەڭ بولىنەدى.

كوكپار الاڭىنىڭ پارامەترلەرى: ۇزىندىعى - 220 م، ەنى - 70 م.

مارە الاڭى 3 مەترلىك ديامەترمەن (شەڭبەر) ورناتىلعان. ەكى كوماندانىڭ مارە شەڭبەرلەرىنىڭ اراسىنداعى قاشىقتىق - 180 م. ورتالىقتان شەڭبەرگە دەيىن - 90 م.

مارەدەن ويىن الاڭىنىڭ سىرتقى سىزىعىنا دەيىن - 20 م.

شەڭبەردەن ايىپپۇل الاڭىنا دەيىن - 35 م، ورتالىق شەڭبەر مەن ەكى جاقتاعى شەڭبەرلەردىڭ ديامەترى - 8 م.

كوماندا كاپيتاندارى جەرەبە تاستاۋ ارقىلى ءوز مارەسىن انىقتايدى دا، مارە سىزىعىنا جالاۋىن ورناتادى.

سايىس ءارقايسىسى 20 مينۋتقا سوزىلاتىن ەكى كەزەڭنەن تۇرادى. كەزەڭدەر اراسىندا 10 مينۋتتىق ءۇزىلىس بولادى. ۇزىلىستەن كەيىن كوماندالار مارە سىزىعىن اۋىستىرادى.

جارىس كەزىندە كوماندانىڭ جانىندا ەكى ادامنان ارتىق بولماۋى كەرەك: 1 جاتتىقتىرۋشى، 1 كوماندا جەتەكشىسى.

جەڭىس ءوز شەڭبەرىنە (مارە سىزىعىنا) ەڭ كوپ سەركە (ءناقپىشىن) تاستاعان كومانداعا بەرىلەدى. سەركەنىڭ (ءناقپىشىن) سالماعى 30-33 كەلىدەن اسپاۋى كەرەك.

كەزدەسۋدىڭ نەگىزگى ۋاقىتى بىتكەندە ەكى كوماندا تەڭ تۇسسە، 5 مينۋتتىق ءۇزىلىس بەرىلەدى، مارە كەي̆ىنگە شەگەرىلەدى جانە قوسىمشا 10 مينۋت ۋاقىت بەرىلەدى. وسى ۋاقىتتا شەڭبەرگە ءبىرىنشى تۇسىرگەن (سالىمدى) توپ جەڭەدى.

ەگەر كوماندالار بەلگىلەنگەن ۋاقىتتا شەڭبەرگە تۇسىرە الماسا، وندا جەڭىمپاز جەكپە-جەك ارقىلى انىقتالادى. ياعني، ەكى كوماندادان ءبىر-ءبىر وي̆ىنشى ورتاداعى شەڭبەردىڭ ىشىنە كىرەدى.

تورەشى سەركەنى ەكى وي̆ىنشىنىڭ ورتاسىنا لاقتىرادى، قاي ويىنشى سەركەنى ۇستاپ الىپ، ءوز شەڭبەرىنە ورنالاستىرسا، سوعان ۇپاي ەسەپتەلەدى. بۇل باعىتتا ءار كوماندادان ءۇش ويىنشىدان ءۇش كەزدەسۋ وتكىزىلەدى.

جەڭىمپاز توپ ۇپاي̆لاردىڭ جالپى سانىمەن انىقتالادى. ءاربىر سايىس ادىسىنە 3 مينۋت ۋاقىت بەرىلەدى، ەگەر بۇل ۋاقىتتا ۇپاي جينالماسا، تورەشى جەكپە-جەكتى توقتاتادى دا، كەلەسى جۇپ شاقىرىلىپ، جەكپە-جەكتى باستاي̆دى.

جەكپە-جەك كەزىندە سەركە شەكتەن شىعىپ (سىرتقا)، ۇرىس توقتاتىلىپ، كەلەسى جەكپە- جەك جالعاسادى.

وي̆ىنداردىڭ باستالۋىنا ءبىر كۇن قالعاندا سپورت ءتۇرى بوي̆ىنشا تورەشىلەر القاسى كوماندالاردىڭ وكىلدەرىمەن بىرلەسىپ تەحنيكالىق كەڭەس وتكىزەدى، وندا جەرەبە تاستالادى جانە بەرىلگەن ءوتىنىم سانىنا قاراي جارىستى وتكىزۋ ءتارتىبى بەلگىلەنەدى.

ايتا كەتەيىك، كەشە ىرىكتەۋ كەزەڭىندە قازاستان، رەسەي، قىرعىزستان جانە تۇركيا كوماندالارى قارسىلاسىن ۇتىپ، شيرەك فينالعا جولداما العان ەدى.

اۆتور
ريزابەك نۇسىپبەك ۇلى