كوشپەندىلەر ويىندارىنا 1 مەترلىك دابىل دايىنداپ جاتىرمىن - ابايلىق قولونەر شەبەرى
سەمەي. KAZINFORM - اباي وبلىسى اباي اۋدانىندا تۇراتىن قولونەر شەبەرى، ەتنوديزاينەر ساكەن نازارحان ۇلى اعاشتان، تەمىردەن، كۇمىس پەن سۇيەكتەن قازاقتىڭ كونە قارۋ-جاراقتارىن جاسايدى.
ەت جاقىنىن تۋعان كۇنىندە ەرەكشە سىيلىقپەن قۋانتقىسى كەلگەندەر وعان تاپسىرىس بەرەدى. ەۋرازيالىق ديزاينەرلەر وداعىنىڭ مۇشەسى تەك قارۋ ەمەس، مۋزىكالىق اسپاپتار، جيھاز بەن ۇلتتىق ىدىس-اياق تۇرلەرىن دە جاساپ كەلەدى. قىركۇيەك ايىندا استانادا وتەتىن دۇنيەجۇزىلىك كوشپەندىلەر ويىندارىنا ول 1 مەترلىك دابىل جاساپ جاتىر ەكەن.
بۇل تۋرالى شەبەر Kazinform تىلشىسىنە بەرگەن سۇحباتىندا ايتتى.
- بويىڭىزداعى بۇل قابىلەتتى قالاي بايقادىڭىز؟
- اباي اۋدانى سارجال اۋىلىنىڭ تۋماسىمىن. قولونەرمەن اينالىسىپ كەلە جاتقانىما 40 جىلداي ۋاقىت بولىپ قالىپتى. ءبارى مەكتەپ قابىرعاسىندا باستالعان-تۇعىن. ول كەزدە كومسومول ۇيىمى دەگەن بولعان. سونىڭ قاتارىندا ءجۇرىپ، ۇستازىمىز اسقار سلياموۆتان ۇيرەنىپ، قولونەرگە يكەمىم كەلەتىنىن كوردىم. العاش رەت كادەسىي رەتىندە كىشكەنتاي دومبىرا جاساعانىم ەسىمدە.
- ۇلتتىق بۇيىمداردى جاساۋىڭىزعا نە تۇرتكى بولدى؟
- 1995-جىلى ەلىمىزدە اباي قۇنانباي ۇلىنىڭ 150 جىلدىعى تويلاندى. سوعان توستاعان، قىمىز قۇياتىن وجاۋ، ۇستەل، ورىندىق جانە باسقا دا زاتتار جاسادىم. ۋاقىت وتە كەلە تاپسىرىس دا ارتا بەردى. ءوزىم دە بۇيىمداردىڭ تۇرلەرىن كوبەيتە ءتۇستىم. قارۋ-جاراقتان قىلىش، نايزا، قالقان، شوقپار، ساداق، مۋزىكالىق اسپاپتاردان دومبىرا، نارقوبىز، سىبىزعى، داۋىلپاز، داڭعىرا جاسايمىن. كورمەلەرگە قويعانعا تەرىگە باسىلعان پورترەتتەردى دە جاسايتىنىم بار.
- قانداي ماتەريالداردى پايدالاناسىز؟
- تورسىق، تاباق سىندى ىدىس-اياقتاردى جاساعانعا كوكتەرەكتى پايدالانامىن. سەبەبى ونىڭ ءدامى شىقپايدى. ال باسقا اعاشتان جاسالسا، اس-سۋدىڭ ءدامىن بۇزىپ جىبەرەدى. نارقوبىزدى قاراعاشتان، تۇيەنىڭ تەرىسى مەن جىلقىنىڭ جال-قۇيرىعىنان جاسايمىن.
نايزا جاساعانعا قايىڭ جاقسى. قىلىشتى بولات تەمىردەن جاسايمىن، ال سابى سۇيەكتەن، قىنابى اعاشتان بولادى. ءبىر قىلىشتى جاساۋعا 1 جارىم اي كەتەدى. قالقانعا قاتىستى ايتار بولساق، قاڭىلتىر تەمىردى دوڭگەلەتىپ كەسىپ، ويۋىن سالامىن. ايتقاندا تەز بولعانمەن بۇل قىر-سىرى كوپ، ۇزاق جۇمىس.
وسكەمەن مەن سەمەيدەگى تۇگەل دەرلىك مۋزەيلەرمەن جۇمىس ىستەيمىن. ولارعا رەستاۆراتسيالىق جۇمىستارمەن قاتار قورلارىنداعى قارۋ-جاراقتاردىڭ كوشىرمەسىن جاساپ بەرەمىن. ءۇيىمنىڭ استىندا شەبەرحانام بار. بارلىعىن سوندا جاسايمىن.
- قاي وڭىرلەردەن تاپسىرىس ءتۇسىپ تۇرادى؟
- اباي وبلىسىنىڭ ءار اۋدانىنان تاپسىرىستار تۇسەدى. ودان بولەك، استانا، الماتى قالالارىنان، شىعىس قازاقستان، قوستاناي وبلىستارىنان تاپسىرىس بەرەتىندەر بار. ءار ءتۇرلى كومپانيالاردىڭ سۇرانىسىمەن كادەسىيلار جاساپ جىبەرىپ تۇرامىن. 2005-جىلدان باستاپ وسى ۋاقىتقا دەيىن ەلورداداعى «قايىسمان» دۇكەنىنە كادەسىيلار جىبەرەمىن.
ەت جاقىنىنىڭ تۋعان كۇنىنە ەرەكشە سىيلىق بەرگىسى كەلگەندەر مەن اسكەري ادامدار قارۋ-جاراق الىپ جاتادى. ساداقتى وزىنە الىپ، ۇيىنە ءىلىپ قوياتىندار دا بار. ال مامىر ايىنان كۇزگە دەيىن قىمىز پىسكەن ۋاقىتتا كۇبىگە دەگەن سۇرانىس ارتادى. تاباق، استاۋ الاتىندار دا از ەمەس.
- كەز كەلگەن ادام قولونەرشى بولا الا ما الدە بۇل ءۇشىن تۋابىتتى قابىلەت كەرەك پە؟
- كوپ ادام وسىنداي شۇقىما جۇمىستان قاشادى. قازىر ەندى بۇرىنعىعا قاراعاندا قولدانۋعا بولاتىن جابدىق تۇرلەرى مول. الايدا ول قولمەن ىستەگەنگە جەتپەيدى. ويۋدى دا قولمەن ويعان ءجون. ءتىپتى ول قيسىق كەتسە دە، سونىسىمەن ادەمى بولىپ تۇرادى. قولونەرشى بولۋ ءۇشىن ءبىر ورىندا تاپجىلماي وتىرا الاتىن شىدامدىلىق، قول ەپتىلىگى كەرەك. بۇنداي قابىلەت ەكىنىڭ بىرىندە بار دەپ ايتۋعا كەلمەس.
- 8-14-قىركۇيەكتە استانا قالاسىنداعى V دۇنيەجۇزىلىك كوشپەندىلەر ويىندارىنا اباي وبلىسى دەلاگاتسياسىنىڭ مۇشەسى رەتىندە باراتىنىڭىزدى ەستىدىك. وزىڭىزبەن الا كەتەتىن بۇيىمدارىڭىزدىڭ ىشىندە ەڭ ەرەكشەسى قايسىسى بولماق؟
- ءيا. اباي وبلىسىنان 10 ادام بارامىز. ءبىزدىڭ ءوڭىر اتىنان 3 كيىز ءۇي تىگىلەدى. كوشپەندىلەر ويىنى وتەتىن ايماقتا ءار وبلىستىڭ بۋتيكتەرى بولادى. سوعان ءوزىمنىڭ كادەسىيلارىمدى، قارۋ- جاراقتار مەن ۇلتتىق اسپاپتاردى قويامىن. ەڭ ەرەكشەسى - ۇزىندىعى 1 مەترلىك دابىل بولماق. ونى تامىز ايىنىڭ سوڭىنا دەيىن اياقتاپ قالامىن.
اۆتور تالعاتجان مۇحامەتبەك ۇلى
