كوشپەندىلەر ويىندارى: قازاق ەلى الامانعا 40 ات قوسادى

استانا. KAZINFORM - «تالحيز» با؟ «قاراقىز» با؟ كوشپەندىلەر ويىندارى الدىندا بايگە جانكۇيەرلەرى ءوز جورامالدارىن ايتىپ، تاقىم قىسىپ وتىر. ءبىرى كۇزگە سالىم وتەتىن ءدۇبىرلى دودادا قىرعىزدىڭ جۇيرىگى الاماننىڭ الدى بولادى دەسە، ەكىنشىسى «تالحيز» ەل ءۇمىتىن اقتايدى دەيدى.

ءيا، الەم كوز تىككەن بايراقتى باسەكەدە ۇشقىر بايگەنىڭ 3، ال ءداستۇرلى بايگەنىڭ 4 ءتۇرى بار. ءسويتىپ، الامانعا دايىندىق قالاي؟

ءداستۇرلى بايگەدەن كوشپەندىلەر ويىندارىندا ەل نامىسىن 40 ات قورعايدى. قازىر ىرىكتەۋ بايگەلەرىنىڭ ناتيجەسىندە تەك 24 تۇلپار تىزىمدەلدى. ال قالعان جۇيرىكتەر وسىعان دەيىنگى شاپقان كورسەتكىشتەرى ارقىلى انىقتالادى.

ماڭعىستاۋلىق الەكە دوسقۋات ۇلىنىڭ باپتاۋىنداعى «عاسىر» ءدۇبىرلى دوداعا جولداما العانداردىڭ ءبىرى. ول پاۆلوداردا وتكەن ىرىكتەۋدە الدىنا قارا سالماي، توپ بايگەنىڭ جەڭىمپازى اتاندى. ەندى باپكەر وسى ناتيجەنى بايراقتى باسەكەدە قايتالاۋعا دەن قويىپ وتىر.

الەكە دوسقۋات ۇلى، اتبەگى:

- قۇنان بايگەدە 5- ورىن الدىق. توپ بايگەدەن فارحات باۋىرىمىزدىڭ اتى «عاسىر» ءبىرىنشى كەلىپ جاتىر. ارينە، ول - ۇلكەن جاۋاپكەرشىلىك. فارحات ءىنىمىز كوكتەمدە 2- ورىن العان. بۇگىن، مىنە، باعى جانىپ، 1- ورىن الىپ تۇر. ارينە، كوشپەندىلەردى ۇتۋعا بار كۇش-جىگەرىمىزدى سالامىز. بۇكىل قازاق ەلىنىڭ اتىنان قوسۋعا دايىنبىز.

ايتۋلى باسەكەدە قۇنان 11، توپ 18، الامان بايگە 25 شاقىرىمعا سوزىلادى. ال جورعالار 9 شاقىرىمعا جارىسادى. قازىر قازاق اتبەگىلەر عانا ەمەس، كورشى ەلدەر دە ءداستۇرلى بايگەگە تىڭعىلىقتى دايىندالىپ جاتىر.

ايتا كەتەيىك، شەتەلدىك كوماندالار بايگەنىڭ ءار تۇرىنە تەك 3 تۇلپاردان قوسا الادى.

جومارت سايبولاتوۆ، «بايگە فەدەراتسياسى» ر ق ب ۆيتسە-پرەزيدەنتى:

- قازىر ءبىزدىڭ فەدەراتسياعا 10 شاقتى شەتەلدىك فەدەراتسيالار ءوتىنىش بەرىپ وتىر. ونىڭ ىشىندە موڭعول، قىرعىز، وزبەك، تاجىك باۋىرلارىمىز، ازەربايجان، رەسەي فەدەراتسياسى قاتىسايىقشى دەپ ءوتىنىش ءبىلدىرىپ جاتىر. ءيا، مۇحيت اسقان ەلدەردىڭ استاناعا ات الىپ كەلە المايتىنى انىق. الايدا الامانعا ات قوسام دەسە ءار قازاقتىڭ قوراسىنداعى جاراۋلى اتتى جالعا الۋىنا بولادى. تەك ءوز ەلىنىڭ بالاسىن مىنگىزۋى كەرەك.

دەگەنمەن جۇيرىكتەرىنىڭ كەكىلىن ءتۇيىپ، ەلورداعا ەلەڭدەپ وتىرعاندار دا بار. سولاردىڭ ءبىرى - كورشىلەس قىرعىزدار. ولار ءدۇبىرلى دوداعا اتىشۋلى «قاراقىزدى» باپتاپ وتىر.

نەگىزگى باسەكە وسى قازاق پەن قىرعىز اراسىندا بولادى. ەندى قىرعىزستاننان «بەرەكە» دەگەن جۇيرىك كەلە جاتىر، كوك تۇلپار. بىلتىردان بەرى بايگە الاڭىندا. وتە جاقسى شاۋىپ ءجۇر. ەكىنشىسى - «قاراقىز». «قاراقىز» - ەندى قازاق- قىرعىزعا ءمالىم تۇلپار. «قاراقىز» ءبىر رەت ەكىنشى بولعان «تالحيزدان» قالىپ قالعان قۇنانىندا. ودان كەيىن «قاراقىز» ەكىنشى بولىپ كورمەدى. ءيا، قازاق ىشىندە «قاراقىزدى» بىلمەيتىن اتبەگى كەم. سوڭعى جىلدارى 9 رەت بايگە شاۋىپ، سەگىزىندە الدىنا ات سالدىرماعان. تەك ءبىزدىڭ «تالحيز» عانا قىرعىز تۇلپارىن قاپى قالدىردى. ءيا، جەرگىلىكتى جۇيرىك بيىلعى ماۋسىمدا ءالى بايگە كورمەدى. تەك بىلتىرعى جەتىستىكتەرى ءۇشىن جولداماعا يە بولدى. الايدا باپتاۋلى تۇرعان «تالحيز» بيىلعى ءبىرىنشى بايگەسىندە «قاراقىزدى» ەكىنشى رەت شاڭ قاپتىرادى دەگەن ۇمىتتەمىز.

24.kz