كوشەدە ايۋ ءجۇر: شىعىس قازاقستاندا تۇرعىندارعا ەسكەرتۋ جاسالدى
وسكەمەن. KAZINFORM - شىعىس قازاقستان وبلىسىنداعى سەرەبريانسك قالاسىندا ايۋ ورتالىق الاڭعا دەيىن كىرىپ كەتكەن.
الەۋمەتتىك جەلىدە ايۋدىڭ سەرەبريانسك قالاسىنىڭ ورتالىعىندا ەمىن-ەركىن جۇرگەن ۆيدەوسى تاراپ كەتتى.
قالالىق اكىمدىك ۆيدەونىڭ شىنايى ەكەنىن راستادى. سول جەرگە جەدەل ارەكەت ەتۋ توپتارى اتتانعان. ولاردان بولەك، ءتۇز تاعىسىن ىزدەۋگە پوليتسيا مەن ورمان ينسپەكسياسى جۇمىلدىرىلدى. دەگەنمەن، ايۋ ازىرگە تابىلماي جاتىر.
- قازىر ءبىز بىرلەسىپ ايۋدى ىزدەپ جاتىرمىز. ونىڭ قايدان كەلگەنىن ناقتى ايتۋ قيىن. ءبىر بولجام بويىنشا وزەندى ءجۇزىپ وتكەن بولۋى مۇمكىن. تۇرعىنداردىڭ قاۋىپسىزدىگى ءۇشىن بارلىق ءتيىستى شارالار قابىلدانعان، - دەدى سەرەبريانسك قالاسى اكىمىنىڭ ورىنباسارى كسەنيا كوروتكوۆا.
ونىڭ ايتۋىنشا، ايۋدى تامىز ايىنىڭ باسىندا قالا ماڭىنان كورگەندەر دە بولعان. ءبىراق سول كەزدە ول ۇستاتپاي كەتتى.
وسى رەتتە، تۇرعىندارعا قاراڭعى ۋاقىتتا دالاعا شىقپاۋعا جانە بالالاردى قاراۋسىز قالدىرماۋعا كەڭەس بەرىلدى.
اۆتور
تالعاتجان مۇحامەتبەك ۇلى
