كوشە ساۋداسى جاسىرىن سىبايلاس جەمقورلىق جولدارىمەن رەتتەلۋدە - دەپۋتات

استانا. KAZINFORM - ەلىمىزدە ەرەكشە قاجەتتىلىكتەرى بار ازاماتتار مەن وتاندىق تاۋار وندىرۋشىلەرگە باسىم قۇقىقتى قامتاماسىز ەتەتىن ستاتسيونارلىق ەمەس ساۋدا وبەكتىلەرى ءۇشىن ورىندار ءبولۋ قاعيدالارىن ازىرلەۋ ۇسىنىلدى.

ءماجىلىستىڭ جالپى وتىرىسىندا دەپۋتات ايتۋار ايماعامبەتوۆ وسى ماسەلەنى كوتەرىپ دەپۋتاتتىق ساۋال جولدادى.

«بىزگە شاعىن بيزنەس سۋبەكتىلەرى دۇڭگىرشەك، ساۋدا پاۆيلونى، اۆتودۇكەندەرگە ورىن الۋعا جاردەم سۇراپ جۇگىندى. ماسەلەنى زەرتتەگەننەن كەيىن ءبىز جاعىمسىز قورىتىندىعا كەلدىك. ساۋدا جانە ينتەگراتسيا مينيسترلىگى، سونداي-اق جەرگىلىكتى اتقارۋشى ورگاندار بۇل ماسەلەنى ءوز بەتىنشە قالدىرعان. قازىر بۇل باعىت دۇرىس رەتتەلمەگەن جانە سىبايلاس جەمقورلىق تاۋەكەلدەرى ايماعىندا تۇر»، - دەدى ايتۋار قوشمامبەتوۆ.

سونداي-اق حالىق قالاۋلىسى جەرگىلىكتى اتقارۋشى ورگانداردىڭ قۇزىرەتتەرىن اتادى.

- كاسىپكەرلىك قىزمەتتى جانە ينۆەستيتسيالىق احۋالدى دامىتۋ ءۇشىن جاعدايلار جاساۋ؛

- ستاتسيونارلىق ەمەس وبەكتىلەردى ورنالاستىرۋ ورىندارىن ايقىنداۋ جانە بەكىتۋ؛

- ستاتسيونارلىق ەمەس ساۋدا وبەكتىلەرىن ورنالاستىرۋ ورىندارىن جانە باعىتتارىن بولۋگە كونكۋرستار وتكىزۋ.

- جەرگىلىكتى اتقارۋشى ورگاندار بەلگىلەگەن ورىنداردان تىس جەرلەردە بولشەك ساۋدانى جۇزەگە اسىرۋعا زاڭمەن تىيىم سالىنعان.

«ەلىمىزدىڭ ەڭ ءىرى مەگاپوليسى- الماتى قالاسىنداعى بارلىق كوشە ساۋداسى زاڭنان تىس جۇزەگە اسىرىلادى. اكىمدىكتەردىڭ مالىمەتىنشە، ەلىمىزدە بارلىعى 2741 ستاتسيونارلىق ەمەس ساۋدا نىسانى بار. تەك ءبىر عانا استانا قالاسىنىڭ كوشەلەرىمەن ءجۇرىپ، ءبىز 1,5 مىڭنان استام دۇڭگىرشەكتى انىقتادىق. قازاقستاندا سوڭعى 5 جىلدا ستاتسيونارلىق ەمەس ساۋدا وبەكتىلەرىن ورنالاستىرۋ ءۇشىن ورىن بولۋگە 39 كونكۋرس وتكىزىلدى. الماتى قالاسىندا، اتىراۋ، شىعىس قازاقستان، جامبىل، جەتىسۋ، باتىس قازاقستان، قاراعاندى، قوستاناي، قىزىلوردا، پاۆلودار جانە سولتۇستىك قازاقستان وبلىستارىندا كونكۋرستار مۇلدەم وتكىزىلمەگەن. كونكۋرسسىز دۇڭگىرشەكتەرگە جەر ۋچاسكەلەرى قالاي بەرىلدى؟ ! ازىرگە بۇل ۇلكەن سۇراق»، - دەيدى ول.

سونداي- اق دەپۋتات سالالىق مينيسترلىكتە جۇمىسپەن قامتىلعان جانە ستاتسيونارلىق ەمەس ساۋدا وبەكتىلەرىنەن تولەنگەن سالىقتاردىڭ سانى تۋرالى ناقتى مالىمەتتەر جوق ەكەنىن ايتتى.

«وكىنىشكە قاراي بولشەك ساۋدا ەلدىڭ كولەڭكەلى ەكونوميكاسىنىڭ كوشباسشىسى بولىپ قالا بەرەدى. اكىمدىكتەردىڭ جانە مينيسترلىكتىڭ نازارىنان تىس قالعان جەكەلەگەن شەنەۋنىكتەردىڭ جاقتاستارىمەن كوشە ساۋداسى جاسىرىن سىبايلاس جەمقورلىق جولدارىمەن رەتتەلۋدە. اۆتوبۋس ايالدامالارىندا، ساياباقتاردا، سكۆەرلەردە، قاربالاس كوشەلەر بويىندا جاڭا دۇڭگىرشەكتەر پايدا بولدى. زاڭسىز ساۋدا نۇكتەلەرى جەر، ءورت ءسوندىرۋ جانە سانيتارلىق ينسپەكتسيالار مەن پوليتسيانىڭ باقىلاۋىنان قالاي قۇتىلاتىنى تاڭعالارلىق»، - دەيدى ا. قوشمامبەتوۆ.

ودان ءارى حالىق قالاۋلىسى جوعارىدا ايتىلعان جايتتاردى قورىتىندىلاي كەلە، كەلەسى ۇسىنىستاردى العا تارتتى:

ق ر ساۋدا جانە ينتەگراتسيا مينيسترلىگىنە:

1. ەرەكشە قاجەتتىلىكتەرى بار ازاماتتار مەن وتاندىق تاۋار وندىرۋشىلەرگە باسىم قۇقىقتى قامتاماسىز ەتەتىن ستاتسيونارلىق ەمەس ساۋدا وبەكتىلەرى ءۇشىن ورىندار ءبولۋ قاعيدالارىن ازىرلەۋ؛

2. E- Qazyna مەملەكەتتىك پورتالىندا دۇڭگىرشەكتەرگە، اۆتودۇكەندەرگە، سونداي- اق اۋىل شارۋاشىلىعى/فەرمەرلىك جارمەڭكەلەرگە ورىن ءبولۋ ماسەلەلەرى بويىنشا اشىق كونكۋرستار وتكىزۋ مۇمكىندىگىن پىسىقتاۋ.

جەرگىلىكتى اتقارۋشى ورگاندارعا:

1.ىشكى ىستەر ورگاندارىمەن بىرلەسىپ- بارلىق وڭىرلەردە كوشە ساۋداسى بولىگىندە ءتارتىپ ورناتۋ؛

2.ستاتسيونارلىق ەمەس ساۋدا وبەكتىلەردى ورنالاستىرۋ ورىندارى مەن مارشرۋتتارىن انىقتاۋ جانە بەكىتۋ؛

3.ستاتسيونارلىق ەمەس ساۋدا وبەكتىلەرىن ورنالاستىرۋ ورىندارى مەن مارشرۋتتارىن بولۋگە كونكۋرستار وتكىزۋ.

سىبايلاس جەمقورلىققا قارسى ءىس- قيمىل اگەنتتىگىنە:

1.ستاتسيونارلىق ەمەس وبەكتىلەردى زاڭسىز ورنالاستىرۋ ماسەلەسى بويىنشا ۋاكىلەتتى ورگانداردىڭ قىزمەتىنە تەكسەرۋ جۇرگىزۋ؛

2.لاۋازىمدى تۇلعالاردى زاڭمەن بەلگىلەنگەن جاۋاپكەرشىلىككە تارتۋ.