كوپ بولىگى تاماققا كەتەدى. زەينەتكەرلەرگە زەينەتاقىسى جەتە مە؟

استانا. قازاقپارات - قازاقستاندا زەينەتكەرلەرگە زەينەتاقىسى جەتىپ ءجۇر مە؟ ماسساگەت ءتىلشىسى زەينەتكەرلەردىڭ وزىنەن سۇرادى.

«كوپ بولىگى تاماققا كەتەدى»

الماتى تۇرعىنى ايقىز تولەبايەۆا - 30 جىل مەكتەپتە ۇستازدىق ەتكەن مۇعالىم، ال زەينەتكە شىققانىنا 10 جىلداي ۋاقىت بولعان. بۇگىندە ونىڭ زەينەتاقىسى - 195 مىڭ تەڭگە.

«بۇل ءبىر ايعا جەتپەيدى. كۇندەلىكتى تاماعىڭ، ءجۇرىپ-تۇرىسىڭ بار، كەيدە قىزىمنان الامىن. سول قىزىمنىڭ ارقاسىندا شيپاجايلارعا دا بارامىن. شيپاجايلاردىڭ اقىسىن 100 پايىز تولەيمىز، ەشقانداي جەڭىلدىك جوق. وسى جايتتى انىقتاعانىمدا، «زەينەتاقىڭىز 160 مىڭ تەڭگەدەن اسىپ تۇر، ەشقانداي جەڭىلدىك بەرىلمەيدى» دەدى»، - دەيدى زەينەتكەر.

ايقىز تولەبايەۆا اباي وبلىسىندا دۇنيەگە كەلگەن، سەمەي پوليگونىنان زارداپ شەككەندەر قاتارىندا. دەسە دە بۇل ءۇشىن دە ەشقانداي جەڭىلدىك جوق ەكەن.

«40 جىل مەكتەپتە مۇعالىم بولىپ جۇمىس ىستەگەنىم دە بار، زەينەتكە شىققاندا دەمالعىڭ، كينوعا، تەاترعا بارعىڭ كەلەدى. ءبىراق وسىنىڭ ءبارىن ەسەپتەسەم، جەتپەيدى»، - دەيدى ول.

زەينەتكەر دەنساۋلىعىن ساقتاۋ ءۇشىن بەلسەندى ءومىر سالتىن ۇستاناتىن زەينەتكەرلەرگە ارنالعان ورتالىققا باراتىنىن، سوندىقتان تەك كەيبىر ساتتە ءدارىحاناعا اقشا جۇمسايتىنىن ايتادى.

«مەندەگى دياگنوز - ارتروز. سوعان بايلانىستى ءارتۇرلى جاقپا مايلار الىپ وتىرامىن. اي سايىن 4000-5000 تەڭگە تۇراتىن دارۋمەندەر دە الامىن»، - دەدى ول.

ايقىز تولەبايەۆانىڭ زەينەتاقىسىنىڭ كوپ بولىگى تاماققا جۇمسالادى.

«195 مىڭنىڭ كوبى تاماققا كەتەدى دەسەم دە بولادى: ەت الامىز، ءسۇت الامىز، كوكونىس الامىز. قالادا تاماق وتە قىمبات. كۇندەلىكتى تاماقتىڭ باعاسى دا ءوسىپ جاتىر. جاڭا جىلدان كەيىن زەينەتاقى وسەدى دەدى، سوعان ساي تاماق تا، كوممۋنالدىق تولەم دە قىمباتتاپ جاتىر. 195 مىڭ تەڭگەگە ءبىر اي كۇن كورۋ مۇمكىن ەمەس دەپ ويلايمىن. ەڭ كەمى 250 مىڭ تەڭگەدەي بولسا، جەتەر ەدى»، - دەيدى ول.

«كوپ سياقتى كورىنەدى، ءبىراق...»

الماتى تۇرعىنى باعيلا اپايدىڭ زەينەتاقىسى - 180 مىڭ تەڭگە.

«بۇل ءبىر جاعىنان كوپ سياقتى كورىنەدى، ءبىراق ەركىن ءومىر سۇرۋگە از اقشا. ءوزىم بەلسەندى ۇزاق ءومىر ءسۇرۋ ورتالىعىندا جۇمىس ىستەيمىن، بالالارىم كومەكتەسىپ تۇرادى. سولاردىڭ ارقاسىندا ءومىر ءسۇرىپ جاتىرمىن»، - دەيدى ول.

 تىلشىگە بەرگەن سۇحباتىندا باعيلا اپاي ەلۋ جىلداي ۇزدىكسىز ەڭبەك ەتكەنىن، ەندى سول بەينەتىنىڭ زەينەتىن كورگىسى كەلەتىنىن جەتكىزدى.

«زەينەتاقىنىڭ ەڭ ازى، مەنىڭ ەسەبىم بويىنشا، 200 مىڭ تەڭگە بولۋى كەرەك. ويتكەنى ەگدە جاستا بىزگە ءدارى-دارمەك كەرەك. تەگىن دارىلەردىڭ ىشىندە بارى ارزان دارىلەر عانا، ولار زەينەتكەرلەرگە كومەكتەسپەيدى، سوندىقتان دا قىمباتىراعىن ساتىپ الۋىمىز كەرەك. قىستا تايىپ جىعىلماۋ ءۇشىن تابانى جاقسى اياق كيىم الۋىمىزعا تۋرا كەلەدى. تۇپتەپ كەلگەندە ەلۋ جىلداي جۇمىس ىستەپ، جاقسى دەمالعىمىز كەلەدى»، - دەدى ول.

ەسكە سالايىق، بۇعان دەيىن قازاقستانداعى ورتاشا زەينەتاقى قانشا ەكەنى بەلگىلى بولدى.

2024 -جىلعى 1-قازانداعى جاعداي بويىنشا جيىنتىق زەينەتاقىنىڭ ورتاشا مولشەرى - 131810 تەڭگە، ونىڭ ىشىندە ىنتىماقتى زەينەتاقى مولشەرى - 89211 تەڭگە، بازالىق زەينەتاقى - 42599 تەڭگە.

انىقتاما: ەڭبەك جانە حالىقتى الەۋمەتتىك قورعاۋ مينيسترلىگى مالىمەتىنشە، قازاقستاندا زەينەتاقى الاتىن 2 ميلليون 415 مىڭ ادام بار.

قازاقستاندا زەينەتاقى ەسەپتەۋدە تابىس مولشەرى مەن ەڭبەك ءوتىلى نەگىزگى كورسەتكىشتەر سانالادى. 2024 -جىلعى 1-قاڭتاردان باستاپ زەينەتاقىنىڭ ەڭ تومەن مولشەرى - 57853 تەڭگە.