«كەتچۋپ پەن نان»: ديماش جەلىدەگى ازىلگە قاتىستى پىكىر ءبىلدىردى

استانا. قازاقپارات - TikTok جەلىسىندە ديماش قۇدايبەرگەننىڭ The Story of One Sky اتتى ءانىنىڭ ءۇزىندىسى كەڭ تاراپ، جاستار اراسىندا ءازىل-قالجىڭ تۋدىردى.

اقتاۋدا وتكەن كونسەرت كەزىندە ءاننىڭ سوزدەرىن تۇسىنبەي قالعان كەي كورەرمەن الەۋمەتتىك جەلىدە «كەچۋپ پەن نان» دەپ اندەتكەن. بۇعان وزگە قولدانۋشىلار دا قوسىلىپ، «كەتشى سەن بار»، «كەشىر، ديلناز»، «ەت جەيسىڭ بە» سىندى ءوز نۇسقالارىن جارىسا جازادى.

دەگەنمەن، كەي وقىرمان مۇنداي ارەكەتتەردى قاراڭعىلىق پەن مادەنيەتسىزدىككە بالاپ، سىن ايتتى. شىن مانىندە، ديماش اندە «We’re choosing life» - قازاقشا «ءبىز ءومىردى تاڭدايمىز» دەگەن ءسوزدى ايتقان. ءاننىڭ تۇپكى ءمانى - ەكولوگيا، ادامزاتتىڭ بولاشاعى مەن بەيبىت ءومىر تۋرالى تەرەڭ فيلوسوفيالىق ويلارعا قۇرىلعان.

تاراپ كەتكەن ۆيدەو مەن ازىلدەرگە قاتىستى ءانشىنىڭ ءوزى Instagram پاراقشاسىندا پىكىر ءبىلدىرىپ، ءازىلدى دۇرىس قابىلدايتىنىن جەتكىزدى.

- بارشاڭىزعا سالەم! بۇگىن مەنىڭ جەرلەستەرىم الەۋمەتتىك جەلىلەردە مەنىڭ «ءبىر اسپاننىڭ تاريحى» اتتى شىعارمامدى بەلسەندى تۇردە تالقىلاپ جاتقانىن ءبىلدىم. ايتادى عوي، ەگەر ساعان قالجىڭ ايتىلسا، دەمەك سەن ءتىرىسىڭ جانە قىزىقتىسىڭ. شىعارماشىلىق ازىلدەر مەن ىقىلاستارىڭىز ءۇشىن، ءتىپتى كۇتپەگەن فورمادا بولسا دا، راحمەت، قۇرمەتتى جەرلەستەر.

ال مەنىڭ الەمنىڭ تۇكپىر- تۇكپىرىندەگى سۇيىكتى جانكۇيەرلەرىم، ءارقاشان قورعاپ، شىنايىلىق پەن جاقسىلىقتى جاقتاپ جۇرگەندەرىڭىز ءۇشىن كوپ راقمەت. سىزدەردىڭ سوزدەرىڭىز مەن ءۇشىن مۋزىكا سەكىلدى، - دەلىنگەن جازبادا.

ايتا كەتەلىك ديماش قۇدايبەرگەن اقتاۋداعى تۇركى الەمىنە ارنالعان كونسەرتتە ونەر كورسەتكەن ەدى.