ەكس-مينيستر: ج و و الىستان كەلگەن ستۋدەنتتى جاتاقحانامەن قامتۋى كەرەك دەگەن نورما بار
قاۋىپسىزدىك تالاپتارى ساقتالماعان حوستەل مەن جاتاقحانالاردا ادامدار جاتپاۋى ءتيىس. بۇل تۋرالى ءماجىلىس دەپۋتاتى اسحات ايماعامبەتوۆ ءمالىم ەتتى، دەپ حابارلايدى Kazinform.
«حوستەلدەر، جاتاقحانالار نەمەسە تۇرعىن ۇيلەر قاۋىپسىزدىك تالاپتارىمىزعا سايكەس بولۋى كەرەك. ەگەر بۇل تالاپتار ورىندالماسا، حوستەل مەن جاتاقحانالاردا ادامدار جاتپاۋى ءتيىس. باستى ماسەلە - وسىندا. سوندىقتان وسى حوستەلدى كىم قابىلداپ الدى؟ ياعني نىسانداعى قاۋىپسىزدىك ەرەجەلەرى قانشالىقتى قامتاماسىز ەتىلگەنى تەكسەرىس بارىسىندا زەرتتەلەدى»، - دەدى ا. ايماعامبەتوۆ ماجىلىستە تىلشىلەر سۇراعىنا جاۋاپ بەرە وتىرىپ.
دەپۋتاتتىڭ پايىمىنشا، قازىر ەلىمىزدەگى ستۋدەنتتەردى جاتاقحانامەن قامتاماسىز ەتۋ ماڭىزدى.
«كەيىنگى بىرنەشە جىلدا ستۋدەنتتەردى جاتاقحانامەن قامتاماسىز ەتۋ باعىتىندا 30 مىڭنان استام جاڭا ورىن پايدالانۋعا بەرىلدى جانە بۇل جۇمىستى جالعاستىرۋ قاجەت. كەزىندە ءبىز بارلىق ۋنيۆەرسيتەت الىستان كەلگەن ستۋدەنتتەردى جاتاقحانامەن قامتاماسىز ەتۋى كەرەك دەگەن نورمانى بەكىتتىك. ەگەر ولار وسى نورمانى ورىنداماسا، مينيسترلىك باسقا ءتيىستى جازالاۋ شارالارىن، ليتسەنزيالاردى قايتارىپ الۋ سياقتى قادامدار جاساي الادى. اتاپ ايتقاندا، بۇل جاتاقحانالاردىڭ بارلىعى قاۋىپسىزدىك تالاپتارىنا ساي بولۋى كەرەك»، - دەدى اسحات ايماعامبەتوۆ.
ەسكە سالايىق، بۇگىن الماتىدا حوستەل ورتەنىپ، 13 ادام قازا تاپتى. قالالىق توتەنشە جاعدايلار دەپارتامەنتىنىڭ مالىمەتىنشە، ءورت تۋرالى حابارلاما 30-قاراشا كۇنى ساعات 05:33-تە تۇسكەن. ءبىرىنشى ءورت ءسوندىرۋ ءبولىمى شاقىرتۋ ورنىنا 7 مينۋت ىشىندە جەتتى.
«كەلگەن بويدا 1-قاباتى جانە جەرتولەسى جاتاقحاناعا اينالعان 3 قاباتتى تۇرعىن ءۇيدىڭ جانىپ جاتقانى انىقتالدى. الدىن الا اقپارات بويىنشا ءورتتىڭ جالپى اۋدانى - 30 شارشى مەتر. قابىلدانعان شارالارمەن ءورت 06:22-دە جويىلدى»، - دەپ حابارلادى دەپارتامەنتتەن.
ورتتەن زارداپ شەككەن 2 ادام قالالىق جەدەل شۇعىل كومەك كورسەتۋ اۋرۋحاناسىنا جەتكىزىلدى. قالالىق دەنساۋلىق ساقتاۋ باسقارماسىنىڭ مالىمەتىنە سايكەس، ناۋقاستىڭ بىرىنە كومىرقىشقىل گازىنان ۋلانۋ دياگنوزى قويىلدى.
حوستەلدەن 59 ادام ەۆاكۋاتسيالانىپ، 56 سى جاقىن ماڭداعى مەكتەپكە ۋاقىتشا ورنالاستىرىلدى.
الماتىدا حوستەلدە بولعان ءورت تۋرالى سوڭعى مالىمەتتەر مىنا جەردە.
