ۋكرايناداعى قاقتىعىس «جاھاندىق» سيپات الىپ، ەۋروپاعا قاۋىپ توندىردى - ماكرون مالىمدەمەسى

استانا. KAZINFORM - فرانسيا پرەزيدەنتى ەممانيۋەل ماكرون «ۋكراينادا كەڭ اۋقىمدى سوعىس جۇرگىزىپ جاتقان رەسەي بۇكىل ەۋروپاعا قاۋىپ توندىرگەنىن» مالىمدەدى، دەپ حابارلايدى dw.com.

سارسەنبى، 5-ناۋرىزدا حالىققا ارناعان تەلەۇندەۋىندە ول رەسەيدىڭ سولتۇستىك كورەيا ساربازدارى مەن يراندىق اسكەري تەحنيكانى قولدانۋ ارقىلى ۋكرايناداعى سوعىستى «جاھاندىق قاقتىعىسقا» اينالدىرعانىن اتاپ ءوتتى.

سونىمەن قاتار، ماكروننىڭ ايتۋىنشا، رەسەي ءوزىنىڭ اسكەري الەۋەتىن بەلسەندى تۇردە ارتتىرىپ وتىر.

- رەسەي ۋكراينامەن توقتايدى دەگەنگە كىم سەنەدى؟ رەسەي قازىردىڭ وزىندە فرانسيا مەن ەۋروپاعا قاۋىپ ءتوندىردى، - دەپ مالىمدەدى فرانسيا پرەزيدەنتى.

ماكرون ا ق ش-تىڭ «ءبىز جاقتا بولاتىنىنا» سەنگىسى كەلەتىنىن، ءبىراق ەۋروپا كەرىسىنشە دايىن بولۋى كەرەك ەكەنىن اتاپ ءوتتى. فرانسۋز كوشباسشىسى دونالد ترامپ پرەزيدەنتتىك قىزمەتكە كىرىسكەننەن بەرى رەسەي مەن ا ق ش اراسىنداعى جاقىنداسۋدى «جاڭا ءداۋىر» دەپ اتادى.

فرانسيا ەۋروپالىق وداقتاستارىن يادرولىق قارۋمەن قورعاۋ مۇمكىندىگىن قاراستىرادى، دەپ مالىمدەدى ماكرون. ول سونداي-اق ەۋروپاداعى يادرولىق تەجەۋ ماسەلەسى بويىنشا «ستراتەگيالىق پىكىرتالاسقا» قاتىستى پىكىرىن ايتىپ، گفر بولاشاق كانسلەرى بولۋى مۇمكىن فريدريح مەرتستىڭ (Friedrich Merz) بەرلين، لوندون جانە پاريج اراسىندا ەۋروپا قۇرلىعىنداعى يادرولىق قاۋىپسىزدىك ماسەلەسى بويىنشا كەلىسسوزدەر جۇرگىزۋگە «تاريحي ۇندەۋىن» ەسكە سالدى. ەممانيۋەل ماكرون فرانسيانىڭ يادرولىق قارۋىن قولدانۋ تۋرالى كەز كەلگەن شەشىمدى رەسپۋبليكا پرەزيدەنتى شىعاراتىنىن قوسىپ ءوتتى.

ۇندەۋ بارىسىندا فرانسيا پرەزيدەنتى كەلەسى اپتادا پاريجدە ۋكرايناعا بىتىمگەرشىلىك كۇشتەرىن جىبەرۋ ارقىلى بەيبىتشىلىكتى قامتاماسىز ەتۋگە دايىن ەۋروپا ەلدەرى اسكەرلەرى باس شتاب باسشىلارىنىڭ كەزدەسۋى وتەتىنىن حابارلادى. ماكروننىڭ اتاپ وتۋىنشە، بۇل اسكەرلەر بولاشاق بەيبىت كەلىسىمنىڭ ساقتالۋىن باقىلاۋ ءۇشىن ۋكرايناعا ورنالاستىرىلۋى مۇمكىن.

- ولار بۇگىن سوعىسپايدى، مايداندا سوعىسپايدى، ءبىراق بىتىمگەرشىلىك كەلىسىمگە قول قويىلعان كەزدە ونىڭ تولىق ساقتالۋىن قامتاماسىز ەتۋ ءۇشىن سوندا بولادى، - دەدى فرانسيا پرەزيدەنتى.

سونىمەن بىرگە، ماكرون ۋكرايناداعى بەيبىتشىلىكتى «رەسەيدىڭ بۇيرىعىمەن جانە ەشبىر باعامەن قۇرۋعا بولمايتىنىن» جانە سوعىستى توقتاتۋ تۋرالى كەلىسىم «ۋكراينانىڭ كاپيتۋلياتسياسىن بىلدىرمەۋى» كەرەكتىگىن اتاپ ءوتتى.

اۆتور

زارينا تۋعانبايەۆا