كەنيادا سۋ تاسقىنىنان قازا تاپقاندار سانى 154 ادامعا جەتتى
كەنيادا نوسەر جاۋىن مەن سۋ تاسقىنىنان قازا تاپقاندار سانى 154 ادامعا جەتتى. Kazinform اگەنتتىگى بۇل تۋرالى شينحۋا اقپارات اگەنتتىگىنە سىلتەمە جاساپ حابارلايدى.
كەنيا ۇكىمەتىنىڭ رەسمي وكىلى يسااك مۆاۋرانىڭ دۇيسەنبى كۇنى كەشكە كەنيا استاناسى نايروبيدە جاساعان مالىمدەمەسىنە سايكەس، شىعىس افريكا ەلىنىڭ بىرنەشە بولىگىندە جاۋعان ەل-نينو جاڭبىرىنان تۋىنداعان جويقىن سۋ تاسقىنى سالدارىنان بىرنەشە جول شايىلىپ كەتتى.
«زارداپ شەككەن اۋدانداردا جولدارداعى جوندەۋ جۇمىستارى جاۋىن-شاشىن كولەمى، سۋ دەڭگەيى جانە كولىك قوزعالىسى جاعدايىنا بايلانىستى جۇرگىزىلىپ جاتىر»، - دەپ قوستى ول.
ي. مۆاۋرا سونداي-اق وسى اپتادان باستاپ 11-جەلتوقسانعا دەيىن بۇكىل ەلدە نوسەر جاۋىن جاۋىپ، كۇن كۇركىرەيتىنىن حابارلادى.
ول توقتاۋسىز سۋ تاسقىنى تىرىسقاق جانە سۋ ارقىلى تارالاتىن باسقا دا اۋرۋلاردىڭ تارالۋىنا اكەلىپ سوقتىرعانىن اتاپ ءوتتى.
دەنساۋلىق ساقتاۋ ورگاندارى كەنيا جاعالاۋىنداعى لامۋ وكرۋگىندە تىرىسقاق اۋرۋىنا شالدىعۋدىڭ 103 جاعدايىن راستادى، ونىڭ سالدارىنان ەكى ادام قايتىس بولدى.
اۆتور
زارينا تۋعانبايەۆا
