كەنەسارى حاننىڭ قۇرانى، يسا پايعامبار كەبىنىنىڭ كوشىرمەسى - استانادا ءدىني جادىگەرلەر كورمەسى اشىلدى
استانا. KAZINFORM - ەلورداداعى بەيبىتشىلىك جانە كەلىسىم سارايىندا الەمدىك جانە ءداستۇرلى دىندەر ليدەرلەرىنىڭ VIII سەزى اياسىندا « تۋرين كەبىنى» جانە « قاسيەتتى كىتاپتار» اتتى حالىقارالىق رۋحاني-مادەني كورمەلەر ءوز جۇمىسىن باستادى. اڭىز بويىنشا يسا پايعامباردىڭ ءمايىتى ورالدى دەلىنەتىن «تۋرين كەبىنىنىڭ» دالمە-ءدال كوشىرمەسى استاناعا العاش رەت اكەلىندى.
وعان قوسا، كورمەگە قۇران، ءىنجىل، ءتاۋرات جانە بۋددا سۋترالارى سەكىلدى قاسيەتتى جازبالاردىڭ ءتۇپنۇسقالارى مەن كوشىرمەلەرى قويىلعان.
بۇل حالىقارالىق جوبانى ۇيىمداستىرۋعا قر مادەنيەت جانە اقپارات مينيسترلىگى، كونفەسسياارالىق جانە ءدىنارالىق ديالوگتىڭ حالىقارالىق ورتالىعى، قازاقستانداعى پراۆوسلاۆيە شىركەۋى، استاناداعى ريم-كاتوليك ارحيەپارحياسى، « Kirche in Not» ۇيىمى، سۋۆەرەندى مالتا وردەنىنىڭ گەرمانياداعى وكىلدىگى جانە ACN International پاپالىق قورى اتسالىستى.
« تۋرين كەبىنى» كورمەسى - حريستيان الەمىندەگى ەڭ باعالى جادىگەرلەردىڭ ءبىرى. اڭىز بويىنشا، شامامەن 2000 جىل بۇرىن شەگەلەنىپ تۇرعان يسا ءماسىحتى ءتۇسىرىپ الىپ، دەنەسىن وسى ماتامەن وراعان. اڭىز بويىنشا، كەبىن يەرۋساليمنەن ەدەسسا قالاسىنا، سودان كەيىن كونستانتينوپولگە (قازىرگى ىستانبۇل، تۇركيا)، ءارى قاراي افيناعا دا بارۋى مۇمكىن. سودان كەيىن ليرەي مەن ساپارلاپ، اقىرىندا يتاليانىڭ تۋرين قالاسىنان پانا تاپقان.
- ياھۋدي ءداستۇرى بويىنشا مارقۇمدى جەرلەۋ كەزىندە ونىڭ دەنەسىن ارنايى حوش ءيىستى مايلارمەن مايلاپ، كەبىنگە ورايتىن بولعان. ال يسا ءماسىح قايتا تىرىلگەندە جارىقتىڭ اسەرىنەن ماتانىڭ بەتىندە فوتوسۋرەتتەگىدەي ادام بەينەسى ءسىڭىپ قالعان دەلىنەدى، - دەدى استاناداعى ۋسپەن كافەدرالدى سوبورىنىڭ كىلتشىسى دميتريي بايدەك.
« تۋرين كەبىنىن» كوبىنە « بەسىنشى ءىنجىل» دەپ تە اتايدى جانە حريستيان الەمىندەگى ەڭ قىمبات جادىگەرلەردىڭ ءبىرى سانالادى. اسىرەسە 1898 -جىلى يتاليالىق اۋەسقوي فوتوگراف سەكوندو پيا كەبىندى فوتوعا ءتۇسىرىپ، نەگاتيۆىن قاراعاندا اپ-انىق ادام سۇلباسىن كورىپ، تاڭ قالادى. بۇل كەبىندى ودان ءارى تانىمال ەتىپ، ميستيكا مەن جۇمباققا تولى اڭىزداردىڭ تاراۋىنا ىقپال ەتتى. كوپتەگەن حيميالىق، سوت-مەديتسينالىق، بوتانيكالىق زەرتتەۋلەر وتسە دە، كەبىنگە قاتىستى جاۋاپسىز قالعان سۇراق كوپ. ءتىپتى عىلىمدا وسى كەبىندى زەرتتەيتىن ارنايى سيندولوگيا باعىتى پايدا بولعان. ال ۆاتيكان كەبىنگە قاتىستى رەسمي ۇستانىمىن ايتقان جوق.
كورمەنىڭ اشىلۋ سالتاناتىندا ق ر مادەنيەت جانە اقپارات ءمينيسترى ايدا بالايەۆا بۇل كورمە ءتۇرلى مادەنيەت پەن ءدىن وكىلدەرى اراسىنداعى ديالوگ پەن ءوزارا تۇسىنىستىكتىڭ سيمۆولىنا اينالعانىن، ول ادامداردى ورتاق رۋحاني قۇندىلىقتار مەن ادامزاتتىڭ تاريحي مۇراسىنا دەگەن قۇرمەت توڭىرەگىندە بىرىكتىرەتىنىن اتاپ ءوتتى.
- بۇل كورمە - الدا وتەتىن اۋقىمدى دىندەر سەزىنە دايىندىقتىڭ ماڭىزدى باستاماسى. « تۋرين كەبىنى» - جاي عانا ارتەفاكت ەمەس، ول عاسىرلار بويى پىكىرتالاس، زەرتتەۋلەر مەن رۋحاني تولعانىس تۋدىرىپ كەلە جاتقان سيمۆول. بۇل كورمە - جۇمباق پەن سەنىمگە تولى جادىگەردى كورۋ مۇمكىندىگى عانا ەمەس، ادام بولمىسىنىڭ تەرەڭىنە ءۇڭىلىپ، ءومىردىڭ ءمانى، سەنىم، كەشىرىم مەن ءۇمىت تۋرالى ويلانۋعا شاقىراتىن رۋحاني تاجىريبە. ال «قاسيەتتى كىتاپتار» كورمەسىندە ءتۇرلى دىندەر مەن تاريحي كەزەڭدەرگە تيەسىلى 50 گە جۋىق قاسيەتتى ماتىندەر مەن سيرەك قولجازبالار قويىلعان. ەكسپوناتتار ىشىندە VII عاسىرداعى قۇران، كەنەسارى حاننىڭ قۇران كىتابى، تورا مەن تالمۋد، ءىنجىل مەن يەۆانگەليە كىتاپتار، بۋدديستىك شيىرمالار مەن سيمۆوليكالار جانە شاعىن ءدىني كىتاپتار بار. ولاردىڭ ءارقايسىسى - الەمدىك رۋحاني مادەنيەتتىڭ التىن قورىنا كىرەتىن اسىل مۇرا. ال «قاسيەتتى كىتاپتار» كورمەسى الەمدىك دىندەردىڭ قاسيەتتى جازبالارى ارقىلى ءارتۇرلى ءدىني داستۇرلەردىڭ رۋحاني نەگىزدەرىن كورسەتۋگە باعىتتالدى. ەكسپوزيتسيادا قاسيەتتى جازبالاردىڭ جانە ءتۇرلى دىندەر مەن تاريحي داۋىرلەرگە قاتىستى سيرەك كەزدەسەتىن قولجازبالاردىڭ 50 داناسى ۇسىنىلدى، - دەدى اقپارات جانە مادەنيەت ءمينيسترى.
سونىمەن بىرگە، مينيستر استانادا وتەتىن الەمدىك جانە ءداستۇرلى دىندەر ليدەرلەرىنىڭ سەگىزىنشى سەزى قازاقستاننىڭ بەيبىتشىلىك، كەلىسىم جانە گۋمانيزم يدەيالارىنا ادالدىعىن ايقىن كورسەتەتىن ماڭىزدى حالىقارالىق وقيعالاردىڭ ءبىرى ەكەنىن ايتتى.
- قازاقستاننىڭ كونفەستسياارالىق ديالوگ سالاسىنداعى تاجىريبەسى حالىقارالىق قاۋىمداستىق تاراپىنان ۇلكەن قولداۋ تاپتى. بۇل قازىرگى گەوساياسي احۋال تۇراقسىزدانىپ، جەر جاھاندا سوعىس پەن قاقتىعىستار جيىلەگەن كەزەڭدە اسا وزەكتى. ءدىنارالىق ديالوگ پەن ءوزارا قۇرمەت ەجەلدەن ەلدەر مەن حالىقتار اراسىنداعى تاتۋ قارىم-قاتىناستىڭ نەگىزگى تەتىگى سانالادى. استاناداعى سەزد - ءتۇرلى دىندەر مەن ۇلت وكىلدەرىنىڭ اراسىندا مادەني سەنىم مەن ءوزارا قۇرمەتتى قالىپتاستىرۋعا ىقپال ەتەتىن، زاماناۋي وزەكتى ماسەلەلەردى اشىق ءارى سىندارلى تالقىلاۋعا مۇمكىندىك بەرەتىن بىرەگەي الاڭعا اينالدى، - دەدى ا. بالايەۆا.
«تۋرين كەبىنى» جانە «قاسيەتتى كىتاپتار» كورمەلەرى 1-تامىز بەن 25-قىركۇيەك ارالىعىندا بەيبىتشىلىك جانە كەلىسىم سارايىندا بارلىق كەلۋشىگە قولجەتىمدى بولادى. قوس كورمەنىڭ باستى ماقساتى - ءارتۇرلى ءدىني كونفەستسيالاردىڭ تاريحي جانە رۋحاني مۇراسىن كەڭىنەن تانىتۋ ارقىلى قوعامدا ءدىنارالىق تۇسىنىستىك پەن ءوزارا قۇرمەتتى نىعايتۋ، سونداي-اق كورمەگە كەلۋشىلەردىڭ رۋحاني-تانىمدىق كوكجيەگىن كەڭەيتۋ بولماق.
ايتا كەتەيىك، قىركۇيەك ايىندا استانادا الەمدىك جانە ءداستۇرلى دىندەر ليدەرلەرىنىڭ VIII سەزى وتەدى.
