كەنشىلەردەن اقشا بوپسالاعان قىلمىستىق توپتىڭ تاعى 8 ادامى ۇستالدى

قاراعاندى. KAZINFORM - قاراعاندى وبلىسىنىڭ پوليتسەيلەرى ۇلتتىق قاۋىپسىزدىك كوميتەتى دەپارتامەنتى قىزمەتكەرلەرىمەن بىرلەسىپ، Qarmet ا ق جۇمىسكەرلەرى مەن اباي قالاسى تۇرعىندارىن بوپسالاعان قىلمىستىق توپتى قۇرىقتاۋدىڭ ەكىنشى كەزەڭىن وتكىزدى، دەپ حابارلايدى Polisia.kz.

ەسكە سالا كەتەيىك، ىشكى ىستەر مينيسترلىگى وتكەن جىلدىڭ جەلتوقسان ايىندا Qarmet كەنشىلەرىن بوپسالاعان قىلمىستىق توپتى ۇستاعان.

سول كەزدە قىلمىستىق توپتىڭ 7 مۇشەسى قاماۋعا الىندى.

بىرنەشە قىلمىستىق ءىستى تەرگەۋ بارىسىندا ۇستالعاندارعا قاتىستى ۇيىمداسقان قىلمىستىق توپ قۇرۋ، وعان باسشىلىق جاساۋ جانە قاتىسۋ بويىنشا سوتقا دەيىنگى تەرگەۋ ءجۇردى.

تەرگەۋ بارىسىندا جالپى قۇنى 55 ميلليون تەڭگەدەن استام وزگە دە بوپسالاۋ دەرەكتەرى انىقتالدى.

سونداي-اق ولاردىڭ «قازاقستان تەمىر جولى» ا ق وبەكتىلەرىنەن تاۋار- ماتەريال ۇرلاۋ دەرەگىنە قاتىسى بارى انىقتالدى.

وسىعان وراي وسى جىلدىڭ 13-اقپانىندا پوليتسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسىنىڭ جانە ۇلتتىق قاۋىپسىزدىك كوميتەتى دەپارتامەنتىنىڭ جەدەل ۋاكىلدەرى جوعارىدا اتالعان قىلمىستارعا قاتىسى بار تاعى 8 ادامدى ۇستادى.

پوليتسيا قىزمەتكەرلەرى 25 ءتىنتۋ جۇرگىزىپ، تىركەلمەگەن اتىس جانە سۋىق قارۋ، وق-ءدارى جانە ءدىني كىتاپتار تاركىلەدى.

ولاردىڭ وسىعان ۇقساس باسقا دا قىلمىسقا قاتىسى تەكسەرىلىپ جاتىر.

اتالعان جۇمىستار ىشكى ىستەر مينيسترلىگىنىڭ باقىلاۋىندا.