كۇندە ەت جەسە نە بولادى؟

استانا. KAZINFORM - تاماق تانۋ ءبىزدىڭ جالپى دەنساۋلىعىمىزدا شەشۋشى ءرول اتقارادى. الايدا بارلىق نارسەدە سەكىلدى تاماقتانۋدا دا شامانى ءبىلۋ ماڭىزدى. وزەكتى ماسەلەنىڭ ءبىرى - ەت جەۋ. راتسيوندا ەتتى ونىمدەردىڭ كوپ بولۋى اعزاعا قالاي اسەر ەتۋى مۇمكىن؟ ەتتى كۇندە جەۋگە بولا ما؟

ەتتى كۇندە جەۋ پايدالى ما؟

ەتتى كۇندە جەۋدىڭ ادام دەنساۋلىعى ءۇشىن جاعىمدى دا، جاعىمسىز دا سالدارى بولۋى مۇمكىن. ەت - اعزانىڭ دۇرىس قىزمەت ەتۋىنە قاجەتتى اقۋىز، تەمىر، مىرىش جانە ۆ توبى دارۋمەندەرىنىڭ كوزى. الايدا ەتتى كوپ جەۋ دەنساۋلىققا قاتىستى ءتۇرلى پروبلەمالارعا اكەلۋى مۇمكىن.

ەتتى كوپ جەۋ نەسىمەن قاۋىپتى؟

ارتىق ماي مەن حولەستەرين جۇرەك- قان تامىرلار جۇيەسىنە قاۋىپتى. ەتتە، اسىرەسە قىزىل جانە مايلى ەتتە قانىققان مايلار مەن حولەستەرين مولشەرى كوپ. بۇل كومپونەنتتەردىڭ كوپ بولۋى قانداعى حولەستەرين دەڭگەيىنىڭ ارتىپ كەتۋىنە جانە جۇرەك-قان تامىرلار اۋرۋلارىنىڭ دامۋ قاۋپىن ارتتىرۋى مۇمكىن. حولەستەريننىڭ جوعارى دەڭگەيى قان تامىرلار قابىرعالارىندا تۇيىنشەكتەردىڭ پايدا بولۋىنا، ال ول ارتەريوسكلەروزعا جانە جوعارى قان قىسىمىنا اكەلۋى مۇمكىن.

ونكولوگيالىق اۋرۋلاردىڭ دامۋ قاۋپى. كەي زەرتتەۋلەر ەتتى كوپ جەۋ مەن قاتەرلى ىسىك، اسىرەسە، ىشەك قاتەرلى ىسىگىنىڭ دامۋ قاۋپىنىڭ اراسىندا بايلانىس بار ەكەنىن انىقتاعان.

اسقورىتۋ جانە زات الماسۋ پروبلەمالارى. ەتتى ونىمدەردى كوپ جەۋ اسقورىتۋ ورگاندارىنا كۇش ءتۇسىرۋى مۇمكىن. اۋىر جانە مايلى اقۋىزدار اۋىرلىق سەزىمىن، اسقازان اۋىرۋىن جانە اسقورىتۋدىڭ بۇزىلۋىن تۋدىرۋى مۇمكىن. وعان قوسا، ەتتى كوپ جەۋ زات الماسۋعا اسەر ەتىپ، سەمىزدىك پەن سونىمەن بايلانىستى اۋرۋلاردىڭ دامۋ قاۋپىن ارتتىرادى.

ەكولوگيالىق اسپەكتى. ەتتى كوپ جەۋ قورشاعان ورتاعا دا جاعىمسىز اسەر ەتەدى. ەت ءوندىرۋ پروتسەسى پارنيكتىك گازداردىڭ شىعارىلۋىمەن، سۋ رەسۋرستارىنىڭ لاستانۋىمەن جانە ورمانداردى كەسۋمەن بايلانىستى. الەمدىك دەڭگەيدە ەتتى تۇتىنۋدىڭ ارتۋى پلانەتاداعى ەكولوگيالىق جاعدايدىڭ ناشارلاۋىنا ىقپال ەتەدى.

تەپە-تەڭدىك پەن ارتۇرلىلىك - دۇرىس تاماقتانۋ كىلتى

ەت اقۋىز، تەمىر جانە باسقا دا قورەكتىك زاتتاردىڭ كوزى ەكەنىن ءتۇسىنۋ ماڭىزدى. الايدا كەز كەلگەن تاماقتانۋ ونىمىندەگى سەكىلدى ەت جەۋدە دە تەپە- تەڭدىك پەن تۇرلىلىكتى ساقتاۋ ماڭىزدى. راتسيونعا اقۋىزدىڭ ءارتۇرلى كوزىن قوسۋ كەرەك جانە ەتتى مولشەرمەن جەۋ كەرەك.

ەتتى قالاي جەگەن دۇرىس؟ بىرنەشە كەڭەس

ءار ادامنىڭ جەكە قاجەتتىلىكتەرى ءارتۇرلى بولادى. دەسە دە، ەت تاڭداۋ كەزىندە قاجەت بولۋى مۇمكىن بىرنەشە كەڭەس ۇسىنامىز:

قىزىل ەت. وعان سيىر ەتى، قوي ەتى، جىلقى ەتى جاتادى. قىزىل ەت اقۋىز، تەمىر جانە ۆ توبىنىڭ دارۋمەندەرىنە باي. قىزىل ەتتى وتە كوپ جەۋ ۇسىنىلمايدى جانە ونى سۋعا نەمەسە بۋعا ءپىسىرىپ جەگەن دۇرىس.

وڭدەلگەن ەت ونىمدەرى. شۇجىق، ۆەتچينا جانە باسقا دا وڭدەلگەن ەت ونىمدەرىندە تۇز، كونسەرۆانتتار جانە قوسىمشالار كوپ. ولاردى كوپ جەۋ جۇرەك-قان تامىرلار اۋرۋلارىمەن جانە قاتەرلى ىسىكتىڭ دامۋ قاۋپىمەن بايلانىستى. سوندىقتان ولاردى از جەۋگە تىرىسىڭىز جانە مايسىز ءتۇرىن تاڭداڭىز.

قۇس ەتى. تاۋىق ەتى مەن كۇركەتاۋىق ەتىنىڭ كالورياسى تومەن جانە قىزىل ەتپەن سالىستىرعاندا مايى از بولىپ سانالادى. الايدا باسقا ەت تۇرلەرى سەكىلدى ولاردى دا مولشەردەن تىس كوپ جەمەگەن ءجون.

بالىق ەتى. بالىق ومەگا-3 مايلى قىشقىلدارىنا ماي. ول جۇرەك-قان تامىرلار جۇيەسىنە جانە ميعا جاعىمدى اسەر ەتەدى. بالىقتى جەۋ دۇرىس راتسيوننىڭ ءبىر بولىگى رەتىندە ۇسىنىلادى.

قورىتىندى

ەتتى كوپ جەۋ دەنساۋلىققا قاتىستى كوپتەگەن جاعىمسىز سالدارلارعا اكەلۋى مۇمكىن. اسىرەسە، ەتتىڭ ساپاسىنا، ونى دايىنداۋ ادىسىنە جانە راتسيونداعى كولەمىنە ءمان بەرۋ كەرەك. دۇرىس راتسيون ءارقاشان تەپە-تەڭدىك پەن ارتۇرلىلىككە نەگىزدەلەدى. وڭدەلگەن ەت ونىمدەرى مەن مايلى ەت تۇرىلەرىن ازايتىڭىز. ەتتى مولشەرمەن جەۋ اعزاعا پايدالى.