كەن ورىندارىن قالپىنا كەلتىرۋ بويىنشا جول كارتاسىن ازىرلەۋ ورىنسىز - ۇكىمەت باسشىسى
استانا. KAZINFORM — كارەرلەردى رەكۋلتيۆاتسيالاۋ جول كارتاسىن ازىرلەۋ ورىنسىز. بۇل جايىندا ءماجىلىس دەپۋتاتتارىنىڭ ساۋالىنا پرەمەر-مينيستر ولجاس بەكتەنوۆتىڭ جاۋابىندا ايتىلعان.
«2024-جىلعى 15-قاراشاداعى جاعدايعا سايكەس، قاتتى پايدالى قازبالار بويىنشا 371 قولدانىستاعى كەلىسىمشارت جانە 2351 ليتسەنزيا بار. جەرگىلىكتى اتقارۋشى ورگاندارمەن بىرگە ونەركاسىپ جانە قۇرىلىس مينيسترلىگى كارەرلەردى جويۋ بويىنشا تۇراقتى نەگىزدە جۇمىس جۇرگىزەدى. 402 نىساننىڭ 322 كەلىسىمشارتى مەن ليتسەنزياسى بويىنشا تەكسەرۋ نەمەسە جويۋ اكتىلەرى بار. جىل سوڭىنا دەيىن جەرگىلىكتى اتقارۋشى ورگانداردان قالعان 80 نىسان بويىنشا اكتىلەردى الۋ جوسپارلانعان»، - دەدى ۇكىمەت باسشىسى جاۋابىندا.
ۇكىمەت باسشىسىنىڭ اتاپ وتۋىنشە، تەكسەرۋ نەمەسە جويۋ اكتىلەرى بار كەلىسىمشارتتار مەن ليتسەنزيالاردى مىندەتتەمەلەرىمەن بىرگە ادال ينۆەستورلارعا، ونىڭ ىشىندە بۇزىلعان كەلىسىمشارتتاردى اۋكتسيوندار ارقىلى جەر قويناۋىن پايدالانۋ قۇقىعىن بەرۋ جۇمىستارى جۇرگىزىلىپ جاتىر.
«كارەرلەردى جويۋ جۇمىستارى جۇيەلى نەگىزدە جۇرگىزىلىپ، ۇكىمەتتىڭ تۇراقتى باقىلاۋىندا بولعاندىقتان جول كارتاسىن ازىرلەۋدى ورىنسىز دەپ ەسەپتەيمىز»، - دەدى ولجاس بەكتەنوۆ.
پرەمەر-مينيستر جاۋابىنا قوسىمشا بەرىلگەن انىقتاماعا سايكەس، 2022-2023-جىلدارداعى كەلىسىمشارتتار مەن ليتسەنزيالار مىندەتتەمەلەرىنىڭ ورىندالۋىن مونيتورينگتەۋ ناتيجەسىندە 402 كەلىسىمشارت پەن ليتسەنزيا بويىنشا جەر قويناۋىن پايدالانۋ قۇقىعى توقتاتىلدى.
ەسكە سالساق، بۇعان دەيىن پرەمەر-ءمينيستردىڭ ورىنباسارى سەرىك جۇمانعارين ءماجىلىس دەپۋتاتتارىنىڭ ساۋالىنا جولداعان جاۋابىندا ماقتا وڭدەيتىن زاۋىتتارعا ەلەكتر قۋاتىن كوتەرمە باعامەن بەرۋگە نە كەدەرگى ەكەنىن ايتتى.
