كەلەسى وليمپياداعا دەيىن كۇتەتىن ازاماتقا عانا تۇرمىسقا شىعامىن - ءابيبا ءابۋجاقىنوۆا

پاريج. KAZINFORM - فرانسيا استاناسى پاريج قالاسىندا ءوتىپ جاتقان وليمپيادا ويىندارىندا دزيۋدودان ايەلدەر اراسىندا 48 كەلى سالماقتا ەل نامىسىن ءابيبا ءابۋجاقىنوۆا قورعاعان بولاتىن.

وكىنىشكە قاراي ءوز سالماعىندا الەمدىك رەيتينگتە 3-ورىندا تۇرعان وتانداسىمىز وليمپيادا ويىندارىن 5-ورىنمەن اياقتاعان بولاتىن. بۇگىن سپورتشى قىزىمىزبەن پاريج تورىندە سۇحباتتاسۋدىڭ ءساتى ءتۇستى.

- ءابيبا، وليمپيادان كەيىن جۇلدەگە قولىڭىز جەتپەي قالعانى ءۇشىن قاتتى جىلاپ، وكىنگەنىڭىزدى جاقسى بىلەمىز. ونىڭ ءبارى دە ءوتتى دە، كەتتى. قازىر قانداي كوڭىل كۇيدەسىز؟

- «ۋاقىتتىڭ جازبايتىن جاراسى جوق» دەپ جاتۋشى ەدى عوي. ارەڭ دەگەندە ءوز-وزىمە كەلىپ قالدىم. دەسە دە ءىشىمدى ءالى دە وكىنىش وتى جاندىرىپ، كۇيدىرىپ تۇر. ءبىراق، قايدان، قالاي جىعىلدىم، سول جەردەن قايتا سولاي تۇرۋعا سەرت ەتتىم وزىمە.

- كەشە، جەكە باپكەرىڭىز، «ەگەر ءابيبا پاريجدە جۇلدەگەر اتانسا، سپورتتان قول ۇزبەك بولعان» دەدى. بۇل قانشالىقتى راس؟

- نەگىزى، ونداي وي بولعانى راس. دزيۋدودان قازاق قىزدارى اراسىندا مەن تۇڭعىش رەت الەم چەمپيوناتىنىڭ جۇلدەگەرى اتاندىم. وليمپيادا ويىندارىندا دا تۋرا سولاي العاشقى قازاق قىزى بولعىم كەلگەن. وكىنىشكە قاراي پاريجدە ول مۇمكىندىك ۇستاتپاي كەتتى. ءبىراق، ءبارى ءبىر سول ارمانعا، سول ماقساتقا قول جەتكىزبەي توقتامايمىن بەل بۋىپ وتىرمىن. لوس-اندجەلەستىڭ اۋىلى دا الىس ەمەس. انە-مىنە دەگەنشە ولدا كەلىپ قالادى.

- قازىر بۇكىل جۇرتتىڭ نازارى وليمپياداشىلارىمىز دا ەكەنى ايتپاساق تا تۇسىنىكتى. الەۋمەتتىك جەلىلەردى قانشالىق قارايسىز؟ ءوزىڭىز تۋرالى قانداي پىكىرلەر ايتىلىپ جاتىر؟

- الەۋمەتتىك جەلىگە كوپ قاراي بەرمەيمىن. وتىراتىن ۋاقىت تا بولا بەرمەيدى. ءبىراق، اراسىندا ينستاگرام جەلىسىنە قوسىلامىن. ءوزىم جايىندا ايتىلعان، جازىلعان پىكىرلەرگە دە كوز قىرىمدى سالامىن. وسى جولى ءبىر بايقاعانىم ءوزىم تۋرالى جامان پىكىرلەر، كوزقاراستار كەزدەستىرگەن جوقپىن. مەن كورگەن پىكىرلەردە «ءابيبا جاسىما، جىلاما، ءالى ءومىرىڭ الدا، كەلەسى وليمپيادادا الاسىڭ، ءبىز ساعان سەنەمىز، قايتا تاتاميعا ورال» دەگەن سياقتى پىكىرلەردى كورىپ جاتىرمىن. ونىڭ ءوزى ماعان ۇلكەن مەدەۋ بولدى. جاقسى ءسوز جارىم ىرىس دەگەن عوي، مەن وسىدان كەيىن دە ءوز-ءوزىمدى قايتا قولعا الا باستادىم. ارمانىم وليمپيادانىڭ مەدالىن الىپ، قازاق سپورتىنىڭ تاريحىن جاڭارتۋ.

- قازىرگى ارمانىڭىز تەك وليمپيادا مەدالى ما؟ باسىڭىزعا اق ورامال تاعىپ، اق كويلەك كيىپ، «اپپاق» كەلىن اتانۋ ويىڭىزدا جوق پا؟

- نەگىزى، وسى وليمپيادادا سول ارمانىم ورىندالعاندا مىندەتتى تۇردە بولاشاق جارىمدى تاۋىپ، تۇرمىسقا شىعىپ، بەسىگىمدى تەربەتىپ ۇيدە وتىرعىم كەلگەن. وسى جولى جەڭىلىپ قالعاننان كەيىن ول ويىمنان اينىپ قالدىم. قازىر جىگىتىم دە جوق. ەگەر مەنى ءتۇسىنىپ، 2028 -جىلعى وليمپياداعا دەيىن كۇتەمىن دەگەن ازامات بولسا، تۇرمىسقا شىعۋعا دايىنمىن.

- اڭگىمەڭىزگە راحمەت!

اۆتور

كۇنسۇلتان وتارباي