كەلەسى پاندەميا قانداي بولادى - عالىم بولجامى

ءومىر تۋرالى عىلىمدار سالاسىنداعى سەرپىلىس ءۇشىن الەمدىك سىيلىقتىڭ لاۋرەاتى اتانعان پاسكال مايەر استاناداعى نوبەل فەستيۆالىندە كەلەسى پاندەميانىڭ ىقتيمال كوزدەرىن بولجادى، دەپ حابارلايدى قازاقپارات ءتىلشىسى.

Нобель
Фото: Фото: ҚазАқпарат

عالىم دۇنيەجۇزىلىك COVID-19 پاندەمياسى ۇلكەن قايعىلى جاعدايعا اكەلىپ، ءبىرىنشى جىلى 3 ميلليون ادامنىڭ ءومىرى قيىلعانىن ايتتى.

«ماۋسىمدىق تۇماۋ پاندەمياسى - بۇل جىل سايىن بولادى جانە ءولىم-ءجىتىم كوپ. مىسالى، فرانسيادا ءبىز جىل سايىن ءولىم-ءجىتىمنىڭ ارتىپ كەلە جاتقانىن كورەمىز. ەستەرىڭىزدە بولسا، COVID-19 ماۋسىمدىق تۇماۋ ما دەگەن پىكىرتالاس تۋىنداعان ەدى. مىسالى، ەبولا ۆيرۋسى دا وتە اۋىر ۆيرۋستىق ينفەكسيا. ءولىم دەڭگەيى شامامەن %50، ءاربىر ەكىنشى ادام قايتىس بولادى. ال COVID-19 سول ينفەكسيالاردىڭ ءجۇزدىڭ ءبىرى»، - دەدى پاسكال مايەر Nobel fest شاراسىندا.

عالىمنىڭ ايتۋىنشا، پاندەميامەن كۇرەس بارىسىندا كوپتەگەن ەلدەر تەز ارەكەت ەتۋ ستراتەگيالارىن ازىرلەدى.

سونداي-اق، قازاقستاننىڭ QazVac ۆاكسيناسىن ءساتتى ازىرلەپ، ونىڭ كلينيكالىق سىناقتارىن تەز وتكەنىن اتاپ ءوتتى.

ودان بولەك، عالىم ميكروورگانيزمدەردىڭ انتيبيوتيكتەرگە توزىمدىلىگىن ادامزات ءۇشىن تاعى ءبىر قاۋىپ دەپ اتادى.

«باكتەريالار ءدارى-دارمەكتەرگە تەز ءتوزىمدى بولادى. وسى سەبەپتى 2050-جىلعا قاراي جىل سايىن 10 ميلليونعا دەيىن كىسى ءولىمى بولۋى مۇمكىن. دۇنيەجۇزىلىك دەنساۋلىق ساقتاۋ ۇيىمى ءبىرقاتار ۇلكەن قاۋىپتى بولجايدى. مىسالى، اركتيكادا توزىمدىلىك گەندەرى بار باكتەريالار مۇز قاباتىنىڭ استىنان تابىلدى»، - دەيدى پ. مايەر.

سپيكەردىڭ مالىمدەۋىنشە، الەمگە جاڭا ءدارى-دارمەكتەر قاجەت، ءبىراق ونى كوممەرتسيالىق تۇرعىدان ءتيىمدى ەتىپ ەشكىم جاساي المايدى.

ايتا كەتەيىك، استانادا ءداستۇرلى Nobel fest فەستيۆالى ءوتىپ جاتىر.

التىنشى رەت ۇيىمداستىرىلعان شاراعا ارنايى شاقىرىلعان نوبەل سىيلىعىنىڭ لاۋرەاتتارى، عالىمدار، بيزنەس وكىلدەرى قاتىسۋدا.

سوڭعى جاڭالىقتار