كەلەستە العاشقى قاربىزدار ساتىلىمعا شىقتى
تۇركىستان. KAZINFORM - تۇركىستان وبلىسى كەلەس اۋدانىندا قاربىز ماۋسىمى ەرتە باستالدى.
بوزاي اۋىلدىق وكرۋگىنە قاراستى تارتوعاي ەلدى مەكەنىندەگى «جۇسىپبەك» شارۋا قوجالىعى العاشقى ءونىمىن نارىققا شىعاردى. شارۋا قوجالىق بيىل 25 گەكتار سۋارمالى القاپقا قاربىز ەككەن. زاماناۋي اگروتەحنولوگيالار مەن تامشىلاتىپ سۋارۋ ءادىسىن قولدانۋ ناتيجەسىندە ءونىم جىلداعىدان ءبىر اپتا بۇرىن ءپىسىپ جەتىلدى.
- قاربىزداردىڭ ورتاشا سالماعى - 10 كەلى، ال ەڭ ىرىلەرى 15 كەلىگە دەيىن جەتەدى. قازىرگى تاڭدا ءونىمنىڭ كەلىسى 200 تەڭگەدەن ساتىپ جاتىرمىز، - دەيدى شارۋا جۇسىپبەك اشىربەكوۆ.
قوجالىق ماۋسىم كەزىندە اۋىل تۇرعىندارىن دا جۇمىسپەن قامتىپ وتىر. مۇندا كۇنىنە 40 قا جۋىق ادام ماۋسىمدىق جۇمىستارعا تارتىلعان. بۇل اۋىل حالقى ءۇشىن تابىس كوزى بولسا، كاسىپ يەسى ءۇشىن - ونىمدىلىكتى ارتتىرۋدىڭ ءبىر جولى.
ايتا كەتەيىك، وتكەن جىلى كەلەس اۋدانىندا 22871 گەكتار جەرگە اۋىل شارۋاشىلىعى داقىلدارى ەگىلىپ، جالپى ءونىم كولەمى 70,1 ميلليارد تەڭگەنى قۇراعان. ال بيىلعى جىلدىڭ العاشقى ءۇش ايىندا بۇل كورسەتكىش 7,6 ميلليارد تەڭگەگە جەتتى. سونداي-اق، جاڭبىرلاتىپ سۋارۋ تەحنولوگياسى دا كەڭىنەن ەنگىزىلگەن.
ەسكە سالا كەتەيىك، بۇدان بۇرىن جەتىسايدا قاۋىن پىسكەنىن جازعان بولاتىنبىز.
