كەلەس اۋدانىندا قىرىققابات ءپىستى
كەلەستىك شارۋالار كۇزدىك قىرىققاباتتى جيناپ جاتىر، دەپ حابارلايدى Kazinform.
تۇركىستان وبلىسىنا قاراستى كەلەس اۋدانىنىڭ ديقاندارى قىستىڭ العاشقى ايىندا اشىق القاپتاعى قىرىققابات ءونىمىن جيناپ جاتىر.
ماسەلەن، وشاقتى اۋىلىنداعى ايكەن شارۋا قوجالىعى 3 گەكتار اۋماققا قىرىققاباتتىڭ بۋحارەست سورتىن ەگىپ، 120 توننا ءونىم جينادى. قازىر شارۋا قىرىققاباتتاردى تاراز جانە قاراعاندى قالالارىنا اپارىپ ساتىپ جاتىر. شارۋا قوجالىعىنىڭ ءتوراعاسى ايكەن اباي ۇلىنىڭ ايتۋىنشا، وڭتۇستىك وڭىردەگى كۇن رايىنىڭ جىلىلىعى شارۋالاردىڭ مول ءونىم الۋىنا ۇلكەن مۇمكىندىك بولىپ تۇر.
«اتا كاسىپپەن اينالىسىپ، قارا قازانىمىزدى قايناتىپ وتىرمىز. وسى ەگىننىڭ ارقاسىندا بالالارىمىزدى ەڭبەككە باۋلىپ، تابىس تاۋىپ جاتىرمىز. جەر تەلىمىمىزگە اعىن سۋ كەدەرگىسىز كەلەدى. الدىمەن ەرتە كوكتەمدە قىرىققابات ەگىپ، ونى كوكتەمنىڭ سوڭىنا قاراي جيناپ وتكىزدىك. سودان شىلدە ايىنىڭ 15-نە دەيىن جەرىمىزدى دايىنداپ، كۇزگى قىرىققابات داقىلىن ەكتىك. اۋا رايىنىڭ قولايلى بولۋىنىڭ ارقاسىندا قىستىڭ باستاپقى كۇندەرىندە ءونىم الىپ وتىرمىز»، - دەدى ايكەن اباي ۇلى.
ايتا كەتەيىك، كەلەس اۋدانىنىڭ اۋىل شارۋاشىلىعى سالاسىنداعى جالپى ءونىم كولەمى وسى جىلدىڭ توعىز ايىندا 56,6 ميلليارت تەڭگە بولعان. سونىمەن قاتار 80-گە جۋىق اۋىل شارۋاشىلىعى تەحنيكاسى جاڭارتىلىپ، اعىن سۋ جۇيەسى تازارتىلدى. ناتيجەسىندە سۋارمالى جەر كولەمى ارتىپ، كەلەس اۋدانى كوكونىس وندىرۋدە وبلىس دەڭگەيىندە ۇزدىكتەر قاتارىنان كورىندى.
اۆتور
قايرات زاينيشيەۆ
