كەلەشەكتە زەينەتاقى جۇيەسىن رەفورمالاۋ قاجەت بولادى - تيمۋر سۇلەيمەنوۆ

استانا. KAZINFORM - كەلەشەكتە قازىرگى قولدانىستاعى زەينەتاقى جۇيەسىن رەفورمالاۋ قاجەت بولادى. بۇل تۋرالى ۇلتتىق بانك ءتوراعاسى تيمۋر سۇلەيمەنوۆ ايتتى.

«قازىرگى قولدانىستاعى زەينەاتىق جۇيەسى ازىرشە بۇگىنگى كۇننىڭ شىندىعىنا جاۋاپ بەرە الادى. دەگەنمەن، ەڭبەك جانە حالىقتى الەۋمەتتىك قورعاۋ مينيسترلىگىنىڭ دە، ۇلتتىق بانكتىڭ دە ەسەپتەۋلەرى كەلەشەكتە ول رەفورمالاۋدى قاجەتسىنەتىندىگىن كورسەتەدى. ويتكەنى، ونىڭ قازىرگى قۇرىلىمى بولاشاق زەينەتكەرلەرگە مول زەينەتاقى تولەمىن الۋعا مۇمكىندىك بەرمەيدى. سوندىقتان دا زەينەتاقى جۇيەسى رەفورمانى قاجەت ەتەدى. شۇعىل ءارى ءدال قازىر رەفورما قاجەت ەمەس. ءبىراق، الداعى ۋاقىتتا، ياعني، ءبىزدىڭ ۇزاق مەرزىمدى مودەلىمىز كەيبىر وزگەرىستەر جاساۋ قاجەتتىگىن كورسەتىپ وتىر»، - دەدى ول ەلوردادا وتكەن بريفينگتە ب ا ق وكىلدەرىنىڭ ساۋالىنا وراي.

تيمۋر سۇلەيمەنوۆتىڭ اتاپ وتۋىنشە، رەفورما قاجەتتىگىن ەڭبەك جانە حالىقتى الەۋمەتتىك قورعاۋ مينيسترلىگى دە، قارجى سەكتورىنىڭ ساراپشىلارى دا، ءبىرىعاي جيناقتاۋشى زەينەتاقى قورىنىڭ ءوزى دە تۇسىنەدى. سول سەبەپتى بارلىق قۇرىلىم بۇل ماسەلەنى شەشۋ ءۇشىن بىرلەسە جۇمىس ىستەيدى.