كۇشىمىز - بىرلىكتە: اتىراۋدان 8 توننا ازىق-تۇلىك، وزگە دە زاتتار اقتوبە وبلىسىنا جىبەرىلدى

اتىراۋ. KAZINFORM - اتىراۋ وبلىسىنىڭ تۇرعىندارى ءۇش كۇندە 8 توننا ازىق-تۇلىك، كيىم مەن ءدارى-دارمەك جينادى. بۇگىن گۋمانيتارلىق كومەك زاتتارى سۋ تاسقىنىنان زارداپ شەككەن اقتوبە وبلىسىنا جونەلتىلدى.

اتىراۋداعى جاستار رەسۋرستىق ورتالىعىنىڭ باسشىسى ءمانسيا ساعيدوللايەۆانىڭ ايتۋىنشا، گۋمانيتارلىق كومەك زاتتارى «كۇشىمىز - بىرلىكتە!» اكسياسى اياسىندا ءۇش كۇندە جينالعان.

«ەلىمىزدىڭ ءبىراز ءوڭىرى سۋ تاسقىنىنان زارداپ شەكتى. وتانداستارىمىز تابيعي اپاتتىڭ قىسپاعىندا قالىپ، قينالعان ساتتە قولداۋ ءبىلدىرۋدى ءجون كوردىك. سول سەبەپتەن، «كۇشىمىز - بىرلىكتە!» اكتسياسى اياسىندا وبلىستىق ىشكى ساياسات باسقارماسى ارنايى شتاب قۇرعان بولاتىن. ءۇش كۇندە اتىراۋلىقتار 8 توننا ازىق-تۇلىك، كيىم، گيگيەنالىق زاتتار مەن ءدارى-دارمەك جينادى. گۋمانيتارلىق كومەكتى جيناۋعا جەرگىلىكتى كاسىپكەرلەر مەن بەلسەندى ازاماتتار، قالالىق جانە وبلىستىق ءماسليحاتتاردىڭ دەپۋتاتتارى، ءتىپتى قاراپايىم تۇرعىندار ۇلەس قوستى»، - دەيدى ءمانسيا ساعيدوللايەۆا.

ونىڭ ايتۋىنا قاراعاندا، 2 جۇك كولىگىنە تيەلگەن گۋمانيتارلىق كومەك زاتتارى اقتوبە وبلىسىنا جىبەرىلدى.

ەسكە سالا كەتەلىك، بۇدان بۇرىن اتىراۋدا ويىل وزەنىنىڭ ماڭىنان 7 شارۋا قوجالىعى قاۋىپسىز اۋماققا كوشىرىلگەنىن جازعان ەدىك.