كەدەن تاريحىنا قاتىستى بىرەگەي جيناق جارىققا شىقتى
الماتى. KAZINFORM - الماتى قالاسىنداعى ورتالىق مەملەكەتتىك ارحيۆتە قازاقستان كەدەن تاريحىنا قاتىستى قۇجاتتار جيناعىنىڭ تۇساۋى كەسىلدى.
شاراعا وتاندىق جانە شەتەلدىك عالىمدار، ارحيۆشىلەر، تاريحشىلار، ولكەتانۋشىلار، ستۋدەنتتەر، ماگيسترانتتار، دوكتورانتتار مەن ب ا ق وكىلدەرى قاتىستى.
كىتاپ اۆتورى ءمارزيا جىلىسبايەۆانىڭ ايتۋىنشا، جيناققا ق ر ورتالىق مەملەكەتتىك ارحيۆىندە ساقتالعان، 1749- 1917 -جىلدار ارالىعىن قامتيتىن قازاق دالاسىنداعى پاتشالىق كەدەن تاريحىنا قاتىستى قۇجاتتار ەنگەن.
- ماقسات - قازاق جەرىندە كەدەن بەكەتتەرىنىڭ قۇرىلۋى مەن جويىلۋىن، ورتا ازيا جانە قىتايمەن جۇرگىزىلگەن ساۋدا- ساتتىقتى، رەسەيلىك ەلشىلەردىڭ مالىمەتتەرىن، تاۋارلاردىڭ سىرتقا شىعارىلىپ، ەلگە اكەلىنۋىنە قاتىستى سالىق سالۋ جۇيەسىن، تاۋار باعالارىن، سونداي-اق قازاقتاردىڭ كەدەن سالاسىندا جۇمىس ىستەۋىنە بايلانىستى ارحيۆ قۇجاتتارىن توپتاستىرىپ، زەردەلەۋ جانە ولاردى كوپشىلىككە ناسيحاتتاۋ. قۇجاتتاردى زەرتتەي كەلە، جيناققا قازاقتاردىڭ جەر-سۋ اتاۋلارىنا جانە كەدەن سالاسىنا قاتىستى ماڭىزدى مالىمەتتەردى عانا ىرىكتەپ ەنگىزدىم. بۇل جيناق بولاشاقتا اۋقىمدى عىلىمي زەرتتەۋلەرگە نەگىز بولا الادى. كەدەن ماسەلەسىنىڭ استارىندا ۇلكەن ساياسات پەن التىن وردا كەزەڭىنە قاتىستى دەرەكتەر دە جاتىر، - دەدى ول.
تاريح عىلىمدارىنىڭ دوكتورى، پروفەسسور، قىتايتانۋشى كلارا حافيزوۆانىڭ پىكىرىنشە، كەدەنگە قاتىستى ماتەريالداردىڭ جيناق تۇرىندە جارىق كورۋى - ەڭ الدىمەن تاريحشىلار ءۇشىن تاپتىرماس كومەك قۇرالى.
- ءبىر عانا قۇجاتتى تابۋ ءۇشىن كوپ ۋاقىت قاجەت. ال بۇل جيناقتان قاجەتتى مالىمەتتى جىلدام تابۋعا بولادى. مۇنداي دەرەكتەر عالىمدار ءۇشىن وتە قۇندى. ارحيۆتىڭ جىل سايىن وسىنداي جيناقتار شىعارا باستاۋى - جاقسى ءۇردىس، - دەيدى ول.
تاريح عىلىمدارىنىڭ دوكتورى سۆەتلانا سماعۇلوۆا دا كىتاپتىڭ تاريحي ماڭىزدىلىعىنا توقتالدى.
- قۇجاتتار جيناعى بولاشاقتا ديپلوماتيا، كەدەن ءىسى مەن ەلشىلىككە بايلانىستى جازىلاتىن ەڭبەكتەرگە ۇلكەن سەپتىگىن تيگىزەدى. بۇل جيناقتىڭ كومەگىمەن كوپتەگەن ماگيسترلىك جانە دوكتورلىق ديسسەرتاتسيا جازىلاتىنىنا سەنىمدىمىن، - دەدى ول.
وسىعان دەيىن قازاق حاندىعى تۇسىندا ساۋدا-ساتتىق قالاي دامىعانى تۋرالى جازعانبىز.
اۆتور
الما مۇقانوۆا
