KCell, Tele2, Beeline كومپانيالارىنىڭ ۇستىنەن تاريف كوتەرۋ تۋرالى «ءسوز بايلاسۋ» كۇدىگىمەن تەكسەرۋ ءجۇرىپ جاتىر

استانا. KAZINFORM - باسەكەلەستىكتى قورعاۋ جانە دامىتۋ اگەنتتىگى ءتوراعاسىنىڭ ورىنباسارى بولات سامبەتوۆ KCell, Tele2, Beeline وپەراتورلارىنىڭ ۇستىنەن «ءسوز بايلاسۋ» كۇدىگىمەن تەكسەرۋ ءجۇرىپ جاتقانىن ءمالىم ەتتى.

- بىزدە ءۇش ءىرى ۇيالى وپەراتور بار ەكەنىن بىلەسىزدەر. ولار: KCell ،Tele2 ،Beeline. ولاردىڭ نارىقتا 30-40 پايىز كولەمىندە ۇلەسى بار. بىلتىر Tele2 شەتەلدىك ينۆەستورلارعا ساتىلعان بولاتىن. قازىر جاڭا ويىنشى نارىققا قانداي وزگەرىس اكەلەتىنىن باقىلاپ وتىرمىز. ءبىراق كەيىنگى بىرنەشە جىلدا تۇتىنۋشىلاردان شاعىم وتە كوپ ءتۇسىپ جاتىر. نارىققا تالداۋ جاساعان كەزدە تاريفتەر ءوسىپ كەلە جاتقانىن كورىپ ءجۇرمىز. كەيىنگى ەكى جىلدا بايلانىس وپەراتورلارىنىڭ ءبارى تاريفتى وسىرگەن. قازىر ءسوز بايلاسۋ كۇدىگى بويىنشا تەكسەرۋ جۇرگىزىپ جاتىرمىز. ولاردىڭ ءبىر ۋاقىتتا تاريفتى ايتارلىقتاي وسىرگەنىن بايقادىق. مونوپولياعا قارسى سالادا مۇنى ءسوز بايلاسۋ دەپ اتايدى، - دەدى اگەنتتىك ءتوراعاسىنىڭ ورىنباسارى  ب ا ق وكىلدەرىنىڭ سۇراعىنا بەرگەن جاۋاپتا.

سونداي-اق، ول اتالعان تەكسەرۋ جىل اياعىنا دەيىن بىتەدى دەگەندى ايتتى.

- قازىر بۇل تەكسەرۋلەردىڭ اياسىندا سوت پروتسەستەرى ءجۇرىپ جاتىر. تەكسەرۋ جىل اياعىنا دەيىن اياقتالۋ كەرەك. سوت ءبىزدىڭ تالاپتارىمىزدى ورىندى دەپ تاپسا، ابونەنتتەردەن الىنعان زاڭسىز سوما وپەراتورلاردان ايىپپۇل رەتىندە بيۋدجەتكە قايتارىلادى، - دەدى بولات سامبەتوۆ.

ايتا كەتەيىك، بيىل رەسپۋبليكالىق جولداردا ۇيالى بايلانىس ساپاسىن جاقسارتۋ جۇمىستارى باستالادى.