كايا كاللاس: ا ق ش-تىڭ ارالاسۋى تاياۋ شىعىستاعى قاقتىعىستىڭ ورشۋىنە اكەلەدى
استانا. KAZINFORM - ەۋروپالىق ديپلوماتيا باسشىسى ترامپ اكىمشىلىگىن يران-يزرايل قاقتىعىسىنا اسكەري تۇرعىدا ارالاسۋدان ساقتاندىردى، دەپ حابارلايدى Euronews.
امەريكا قۇراما شتاتتارىنىڭ اسكەري ارالاسۋى يران مەن يزرايل اراسىنداعى قاقتىعىستىڭ بۇكىل تاياۋ شىعىسقا «تارالۋىنا» جانە ودان دا ۇلكەن قاۋىپتى سيپاتقا يە بولۋىنا اكەلەدى. بۇل تۋرالى ە و- نىڭ سىرتقى ىستەر جونىندەگى جوعارعى وكىلى كايا كاللاس مالىمدەدى.
ونىڭ ەسكەرتۋى دونالد ترامپ ءوزىنىڭ ەلى يزرايلدىڭ جاقتاۋشىسى ءارى سوعىس قيمىلدارىن توقتاتۋ ءۇشىن پراكتيكالىق ءتاسىلدى قولدانا الادى دەپ اشىق ايتقاننان كەيىن پايدا بولدى.
- مۇمكىن ءبىز ارالاساتىن شىعارمىز. ءبىراق قازىر ءبىز بۇعان قاتىسپايمىز، - دەدى امەريكالىق كوشباسشى جەكسەنبىدە ABC News-كە بەرگەن سۇحباتىندا.
كەيىنىرەك ول ەگەر يران «امەريكالىق اسكەرلەرگە تيىسسە»، ا ق ش «قولعاپتارىن تاستاپ، سوققى بەرەتىنىن» ايتتى.
سەيسەنبىدە كاللاس ەۋروپالىق وداق امەريكا قۇراما شتاتتارىنىڭ سوعىسقا قاتىسۋىن قولدامايتىنىن ايتتى.
- ەگەر اڭگىمە ارالاسۋعا كەلەتىن بولسا، بۇكىل ايماق ءسوزسىز قاقتىعىسقا تۇسەدى. بۇل ەشكىمنىڭ مۇددەسىنە ساي كەلمەيدى، - دەدى ەۋروپالىق ديپلوماتيانىڭ باسشىسى ە و- نىڭ 27 سىرتقى ىستەر مينيسترمەن وتكەن بەينەكونفەرەنتسياسىنان كەيىن.
ايتا كەتەيىك، ترامپ يزرايل مەن يران اراسىندا بەيبىتشىلىك ورناتۋعا ۋادە بەردى. ترامپ تاياۋ شىعىستاعى جاعدايعا بايلانىستى G7 سامميتىنەن ەرتە كەتىپ قالدى.
