كاسىپورىندار وتاندىق مەتالدى الەمدىك باعادان 5 پايىز ارزانعا الا الادى
استانا. KAZINFORM - وتاندىق كاسىپورىندار ەلىمىزدە وندىرىلگەن ءبىرقاتار مەتالدى الەمدىك باعادان ارزانعا ساتىپ الا الادى. بۇل تۋرالى ق ر ونەركاسىپ جانە قۇرىلىس مينيسترلىگىنىڭ ونەركاسىپ كوميتەتى ءتوراعاسىنىڭ ورىنباسارى عالىمجان تورەبەك ايتتى.
- مەملەكەت باسشىسىنىڭ جولداۋىندا قويعان ستراتەگيالىق مىندەتتەردىڭ ءبىرى - وتاندىق وڭدەۋ ونەركاسىپتەرىن دامىتۋ، ولاردى وتاندىق شيكىزاتپەن قامتاماسىز ەتۋ. 2021 -جىلى ىشكى تاۋار وندىرۋشىلەردى شيكىزاتپەن قامتاماسىز ەتۋ بويىنشا «ونەركاسىپتىك ساياسات تۋرالى» ق ر زاڭى قابىلداندى. 2024 -جىلى وسى زاڭعا تولىقتىرۋ ەنگىزىلدى. وسى زاڭنىڭ نەگىزىندە وتاندىق كاسىپورىندار شيكىزاتتى لوندوندىق مەتال بيرجاسى باعاسىنان %5 تومەندەتىپ الادى، - دەدى ول و ك ق الاڭىندا.
ونىڭ ايتۋىنشا، جاڭا زاڭ نورماسى قابىلدانعان سوڭ ءاليۋمينييدى ىشكى وڭدەۋ 2 ەسە ارتقان. سونداي-اق 2029 -جىلعا قاراي اليۋمينييدى قايتا وڭدەۋدى 163 مىڭ تونناعا دەيىن ۇلعايتۋ كوزدەلىپ وتىر.
سونداي-اق سپيكەر وتاندىڭ وڭدەۋشىلەرگە قورعاسىننىڭ تونناسى لوندوندىق مەتالل بيرجاسىنان 40 دوللارعا دەيىن تومەن بەرىلەتىنىن اتاپ ءوتتى.
ەسكە سالا كەتسەك، 2024 -جىلى قازاقستاننىڭ شيكىزاتتىق ەمەس ونىمدەرى اراسىندا ەكسپورتتىڭ ەڭ جوعارى ءوسىمىن مەتاللۋرگيا سالاسى كورسەتتى.
اۆتور
ەربول جانات
