كاسىپقوي بوكس: جانىبەك ءالىمحان ۇلىنىڭ كەزەكتى قارسىلاسى تۋرالى نە بىلەمىز

استانا. قازاقپارات - WBO/IBF تۇجىرىمى بويىنشا ورتا سالماقتاعى الەم چەمپيونى جانىبەك ءالىمحان ۇلى (15-0، 10 ك و) 4 -قازان كۇنى IBF تيتۋلىنا مىندەتتى قارسىلاسى اندرەي ميحايلوۆيچپەن (21-0, 13 ك و) قولعاپ تۇيىستىرەدى. وسى ورايدا، جانىبەكتىڭ قارسىلاسى تۋرالى سارالاپ كورگەن ەدىك.

اندرەي ميحايلوۆيچ دريسسەن 1997 -جىلى 15-جەلتوقسان كۇنى رەسەيدىڭ سانكت-پەتەربۋرگ قالاسىندا دۇنيەگە كەلگەن. 1999 -جىلى، جاڭا زەلانديالىق وتباسى ميحايلوۆيچ جانە ونىڭ ەگىز اعاسىن 18 ايلىق كەزىندە بالالار ۇيىنەن اسىراپ العان.

ميحايلوۆيچ اۋەسقوي بوكستا جاقسى ناتيجەلەرگە قول جەتكىزدى. اۋەسقوي مانسابىندا ول بىرنەشە مارتە جاڭا زەلانديا ۇلتتىق چەمپيوناتتارىندا باق سىنادى جانە سولتۇستىك ارالداعى «التىن قولعاپ» چەمپيوناتىنىڭ جەڭىمپازى اتاندى.

2018 -جىلى ول ءوزىنىڭ قازىرگى جاتتىقتىرۋشىسى جانە مەنەدجەرى يسااك پيچپەن تانىسىپ، سول جىلدىڭ ساۋىرىندە كاسىپقوي بوكستاعى العاشقى كەزدەسۋىن روب رەمسيگە قارسى وتكىزدى.

كاسىپقوي بوكستاعى مانسابىنىڭ العاشقى 12 ايىندا ول 8 جەكپە- جەك وتكىزىپ، بۇرىنعى WBA PABA جانە جاڭا زەلانديا چەمپيونى ادريان تايحيانى، سونداي-اق، بۇرىنعى IBO وكەانيا چەمپيونى چەيز حەيلي سىندى مىقتى قارسىلاستاردى جەڭدى.

26 جاستاعى بوكسشى كاسىپقوي رەينگتە 21 جەكپە-جەك وتكىزىپ، بارلىعىندا جەڭىسكە جەتسە، 13 ايقاسىن مەرزىمىنەن بۇرىن اياقتاعان. بۇل كۇندە ول ورتا سالماقتاعى IBF Pan-Pacific جانە WBO Global تيتۋلدارىن يەلەدى.

BoxRec پورتالىنداعى ورتا سالماقتاعى الەمدىك رەيتينگىدە جاڭا زەلانديالىق بوكسشى 21- ورىندا.

ايتا كەتەرلىگى، جانىبەك ءالىمحان ۇلى ميحايلوۆيچتىڭ كاسىپقوي مانسابىنداعى ەڭ مىقتى قارسىلاسى. بۇل جەكپە-جەك ونىڭ العاشقى رەت الەم چەمپيونى تيتۋلىنا تالاسۋى.

بۇعان دەيىن حابارلاعانىمىزداي، جانىبەك بۇگىن جەكپە-جەك الدىنداعى سالماق ولشەۋ راسىمىنەن ءوتتى. جانىبەك تارازىدا 159,6 فۋنت (72,3 ك گ) بولدى، ال اندرەي- 159,9 فۋنت (72,5 ك گ) شىقتى.

كەشە باسپا ءسوز ءماسليحاتىندا جانىبەك قارسىلاسىن جەڭەتىنىنە سەنىمدى ەكەنىن، سيدنەيدە ەلىمىزدىڭ بايراعىن جەلبىرەتكىسى كەلەتىنىن ايتقان ەدى.

ايتا كەتەيىك، جانىبەك -اندرەي جەكپە-جەكگى No Limit Boxing پروموۋتەرلىك كومپانياسىنىڭ ۇيىمداستىرۋىمەن 4 -قازان كۇنى اۆستراليانىڭ سيدنەي قالاسىنداعى The Star ارەناسىندا وتەدى.

بوكسشىلار IBF الەم چەمپيونى اتاعى ءۇشىن جۇدىرىقتاسادى.

كاسىپقوي بوكس كەشىن قازاقستاندىقتار «Qazsport» تەلەارناسىنان تىكەلەي ەفيرىنەن كورە الادى.

ەسكە سالا كەتسەك، ەكى بوكسشى اراسىنداعى ايقاس 13 -شىلدە كۇنى لاس-ۆەگاستە (ا ق ش) ءوتۋى ءتيىس ەدى. الايدا، وتانداسىمىز سالماق قۋۋ سالدارىنان ەسىنەن تانىپ قالعان بولاتىن.

اۆتور

مۇحتار قاليموللا ۇلى