كاسىپقوي بوكس: جانىبەك ءالىمحان ۇلى قارسىلاسىن نوكاۋتپەن جەڭدى
استانا. KAZINFORM - ورتا سالماقتا WBO جانە IBF نۇسقاسى بويىنشا الەم چەمپيونى، قازاقستاندىق كاسىپقوي بوكسشى جانىبەك ءالىمحان ۇلى (16-0، 11ك و) استانادا ءوتىپ جاتقان «Battle of the Brave» بوكس كەشىنىڭ باستى جەكپە-جەگىندە ونەر كورسەتتى.
12 راۋندقا جوسپارلانعان ايقاستا وتانداسىمىز فرانتسيالىق اناۋەل نگاميسسينگەمەن (14-0, 9 ك و) جۇدىرىقتاستى.
العاشقى راۋندتىڭ سوڭعى سەكۋندىندا قازاقستاندىق بوكسشى قارسىلاسىنا تۋرا سوققى باعىتتاپ، نوكداۋنعا ءتۇسىردى.
وسىدان كەيىن، وتانداسىمىز شارشى الاڭدا ەركىن قيمىلداپ، ءوز مانەرىندە بوكستاستى. جانىبەك ءار راۋند سايىن شابۋىلدى ۇدەتىپ، قارسىلاسىنا ءدال سوققىلارىن دارىتتى.
بەسىنشى راۋندتا فرانسيالىق بوكسشى جانىبەكتىڭ اۋىر سوققىسىنان شالقالاي قۇلادى. تورەشى ەسەپ اشىپ، جەكپە-جەكتى مەرزىمىنەن بۇرىن اياقتاتتى.
وسىلايشا، جانىبەك ءالىمحان ۇلى كاسىپقوي مانسابىندا 17- رەت جەڭىسكە جەتىپ، قوس چەمپيوندىق بەلدىگىن ءساتتى قورعادى.
ايقاستان كەيىن، جانىبەك بارلىق قازاقستاندىققا العىسىن ايتتى.
ايتا كەتەيىك، وسىعان دەيىن سۇلتان زاۋربەك (19-0, 13 ك و) كاسىپقوي مانسابىندا 20-جەكپە-جەگىندە جەڭىسكە جەتكەنىن جازعان ەدىك.
مۇحتار قاليموللا ۇلى
