كاسىپكەرلەر ءبىر جىلدا 7,3 تريلليون تەڭگە سالىق تولەدى - گاۋھار بورىبايەۆا

استانا. KAZINFORM - قازاقستانداعى شاعىن جانە ورتا بيزنەس كرەديتىنىڭ ءاربىر ءۇشىنشىسى مەملەكەتتىك قولداۋ شارالارىمەن قامتىلعان. بۇل تۋرالى «Jibek Joly» تەلەارناسىنىڭ «ۋادە» باعدارلاماسىندا قوناق بولعان اتالعان قوردىڭ باسقارما ءتوراعاسى گاۋھار بورىبايەۆا ايتتى.

- ءبىز ءوز جۇمىسىمىزدى باعالاپ، الەۋمەتتىك-ەكونوميكالىق اسەر ارقىلى مەملەكەتتىك باعدارلامانىڭ تيىمدىلىگىن بايقاپ وتىرمىز. بۇگىندە قور 13,5 تريلليون كرەديتتىك پورتفەلى بار شامامەن 220 مىڭ جوباعا قولداۋ كورسەتتى. بيزنەس سۋبەكتىلەرى تولەگەن سالىقتىڭ مولشەرى 2023 -جىلدىڭ قورىتىندىسى بويىنشا 7,3 تريلليون تەڭگەنى قۇرادى. 2024 -جىلدىڭ كورسەتكىشى ءالى دايىن ەمەس. جىل سايىنعى سالىقتاردىڭ ورتاشا تولەمى 1,5-تەن 2 تريلليون تەڭگەگە دەيىن جەتەدى. شامامەن 200 مىڭ جۇمىس ورنى قۇرىلىپ، 1,2 ميلليونعا جۋىق جۇمىس ورنىن ساقتاي الدى، - دەدى گاۋھار بورىبايەۆا.

سونىمەن قاتار ول مەملەكەتتىك قولداۋدىڭ اياسىندا كاسىپكەرلەرىمىز وندىرەتىن ءونىمنىڭ دە ۇلكەن ءمانى بار ەكەندىگىن ايتادى. بۇگىندە ول شامامەن 130 تريلليون تەڭگەنى قۇرايدى.

- ەگەر 2024 -جىلدىڭ 1-قازانىنداعى دەرەكتەردى الار بولساق، قازاقستان بويىنشا شاعىن جانە ورتا بيزنەستىڭ كرەديتتىك پورتفەلىنىڭ سومماسى 8,4 تريلليون تەڭگە بولسا، تەك «دامۋ» قورى ارقىلى عانا مەملەكەتتىك قولداۋ شارالارىمەن قامتۋ 30 پايىزعا جەتەدى. بۇل - 2,3 تريلليون تەڭگە. قازاقستانداعى شاعىن جانە ورتا بيزنەس كرەديتىنىڭ ءاربىر ءۇشىنشىسى مەملەكەتتىك قولداۋ شارالارىمەن قامتىلعان، - دەدى ول.

بۇعان دەيىن «دامۋ» قورى ترانسفورماتسيالاناتىنى تۋرالى حابارلاعان ەدىك.