كاسىپكەر زاڭسىز تەرگەلگەن جىلدار ءۇشىن 40 ميلليون تەڭگە ءوندىرىپ الدى
استانا. KAZINFORM - اقمولا وبلىسىنىڭ سوتى ءۇش جىل بويى قاماۋدا جانە ءۇي قاماقتا بولعان، كەيىن قىلمىس قۇرامى بولماعاندىقتان جابىلعان ءىس بويىنشا ءوڭىر تۇرعىنىنىڭ ءوتىنىشىن قاناعاتتاندىردى. وندىرىلگەن قارجى 39,8 ميلليون تەڭگەنى قۇرادى.
سوتتىڭ باسپا ءسوز قىزمەتىنىڭ حابارلاۋىنشا، شاعىمدانۋشى ج ش س- نىڭ جەتەكشىسى ءارى شارۋا قوجالىعىنىڭ يەسى ماتەريالدىق شىعىندى، جوعالتقان جالاقىسىن، مورالدىق زياندى وتەپ الىپ، پوليتسيا قىزمەتكەرلەرىن ب ا ق ارقىلى كەشىرىم سۇراتقىسى كەلگەن.
ايىپتاۋشى ق ر قارجى مينسترلىگى مەن پوليتسيا دەپارتامەنتى بولدى.
ءىس ماتەريالدارى بويىنشا 2019-جىلدىڭ قازانىندا ەل ازاماتىنا قاتىستى ۇيىمداسقان قىلمىستىق توپ قۇرىپ، مۇلىك ۇرلادى دەگەن ايىپ بويىنشا تەرگەۋ باستالعان. 2020-جىلدىڭ قىركۇيەگى مەن 2023-جىلدىڭ شىلدەسىندە ول قاماۋدا جانە ءۇي قاماقتا بولعان.
ايىپتالۋشى زاڭسىز قىلمىستىق قۋدالاۋعا بايلانىستى ءوزىنىڭ بيزنەسىن جۇرگىزە الماي، كىرىسىنەن ايىرىلعانىن ايتقان. ال ونىڭ ج ش س- سى 2021-جىلى بانكروت دەپ تابىلعان.
سونىمەن قاتار 2023-جىلى جەر پايدالانۋ قۇقىعىنان ايىرىلعان.
ءبىرىنشى دەڭگەيدەگى سوت ونىڭ شاعىمىن ءىشىنارا قاناعاتتاندىردى. ياعني ادۆوكات قىزمەتى ءۇشىن 14 ميلليون تەڭگە، جوعالتقان جالاقىسى ءۇشىن 16,8 ميلليون تەڭگە جانە مورالدىق زيان ءۇشىن 9 ميلليون تەڭگە ءوندىرىپ بەردى.
وسىعان دەيىن الماتى اۋەجايىندا كەپىلگە الۋ ءىسى بويىنشا سوت قايتا باستالعانى تۋرالى جازدىق.
