كاسپي تەڭىزىندە جاساندى ارالدار پايدا بولۋى مۇمكىن
اتىراۋ. KAZINFORM - كاسپي تەڭىزىنىڭ ازەربايجان رەسپۋبليكاسىنىڭ اۋماعىنداعى بولىگىندە جاساندى ارالدار سالىنۋى مۇمكىن.
«ۆەستنيك كاۆكازا» پورتالىنىڭ حابارلاۋىنشا، ەل پارلامەنتى كاسپي تەڭىزىندە جاساندى اۋماقتار قۇرۋ تۋرالى زاڭ جوباسىن ءۇشىنشى وقىلىمدا ماقۇلداعان.
زاڭعا سايكەس جاڭا ارالدار قۇرىلادى. ءتىپتى، بۇرىننان بار اۋماقتاردى ۇلعايتۋ كوزدەلەتىنى جوققا شىعارىلمايدى.
«ازەربايجان رەسپۋبليكاسى كاسپي تەڭىزىندە جاساندى جەر تەلىمدەرىن سالۋدى جوسپارلاپ وتىر. ەل پارلامەنتى «كاسپي تەڭىزىنىڭ (كولدىڭ) ازەربايجان رەسپۋبليكاسىنا تيەسىلى بولىگىندە جاساندى جەر تەلىمدەرىن قۇرۋ تۋرالى» زاڭ جوباسىن ءۇشىنشى وقىلىمدا قابىلدادى. جاساندى اۋماقتار جاعالاۋ بەلدەۋىن كەڭەيتۋى نەمەسە تەڭىزدەگى جەكە ارالدارعا اينالۋى مۇمكىن»، - دەپ جازدى «ۆەستنيك كاۆكازا».
كاسپي جاعالاۋىنداعى بۇل ەل شامامەن ون جىلداي بۇرىن «حازار ارالدارى» جوباسى بويىنشا جۇمىستى قولعا العان. الايدا، اتالعان جوبا توقتاپ قالعان. بۇل جوبا ءساتتى جۇزەگە اسىرىلسا، تۋريستەردى قىزىقتىراتىن جاڭا ورىنعا اينالۋى مۇمكىن ەدى.
ەسكە سالا كەتەلىك، بۇدان بۇرىن قازاقستان، وزبەكستان جانە ازەربايجان بىرلەسىپ، كاسپي تۇبىمەن كابەل تارتاتىنى حابارلانعان ەدى.
