كاسپي تەڭىزى يتبالىقتارىنىڭ رەزەرۆاتى قۇرىلادى
استانا. KAZINFORM - رەزەرۆات كاسپي يتبالىقتارىنىڭ مەكەنىن ساقتاۋعا مۇمكىندىك بەرەدى. بۇل تۋرالى قازاقستان رەسپۋبليكاسى پرەزيدەنتىنىڭ كەڭەسشىسى - پرەزيدەنتتىڭ حالىقارالىق ەكولوگيالىق ىنتىماقتاستىق جونىندەگى ارناۋلى وكىلى ءزۇلفيا سۇلەيمەنوۆا ءمالىم ەتتى.
بۇگىن ەلوردادا بىرىككەن ۇلتتار ۇيىمىنىڭ ازىق-تۇلىك جانە اۋىل شارۋاشىلىعى ۇيىمى (ف ا و) مەن ەلىمىزدىڭ سۋ رەسۋرستارى جانە يرريگاتسيا مينيسترلىگىنىڭ ۇيىتقى بولۋىمەن سۋ رەسۋرستارىن تۇراقتى باسقارۋ ماسەلەلەرىنە ارنالعان دوڭگەلەك ۇستەل ءوتتى.
- كاسپي تەڭىزى بويىنشا جۇمىس جۇرگىزىلۋدە، بۇل باعىتتا مەملەكەت باسشىسىنىڭ بىرنەشە باستاماسى بار. ءبىرىنشى باستاما - رەزەرۆات قۇرۋ، ونى كاسپي تەڭىزى يتبالىقتارىنىڭ رەزەرۆاتى دەپ اتايمىز. ول رەزەرۆات كاسپي يتبالىقتارىنىڭ مەكەنىن ساقتاۋعا مۇمكىندىك بەرەدى. سونىمەن قاتار كاسپي تەڭىزىن زەرتتەۋ عىلىمي ينستيتۋت قۇرىلدى، ودان بولەك قازىر ءبىز قوسىمشا جوبالار بويىنشا جەكە تالقىلاپ، كونسۋلتاتسيا جۇرگىزىپ جاتىرمىز. اتالعان جوبالار تولىق ماقۇلدانعان كەزدە قوسىمشا اقپارات بەرىلەدى، - دەدى ءزۇلفيا سۇلەيمەنوۆا دوڭگەلەك ۇستەل بارىسىندا اگەنتتىك ءتىلشىسىنىڭ ساۋالىنا جاۋاپ بەرە تۇرىپ.
وسىلايشا، پرەزيدەنتتىڭ ارناۋلى وكىلى كاسپي تەڭىزىن ساقتاۋعا قاتىستى قوسىمشا جوبالاردىڭ قولعا الىنعانىن راستادى.
ەسكە سالا كەتسەك، 2023-جىلى كاسپي سۋىنىڭ تارتىلۋى مەن يتبالىقتىڭ قىرىلۋ سەبەبىن زەرتتەيتىن ينستيتۋت اشىلاتىنى تۋرالى حابارلاعان ەدىك.
دەگەنمەن بىلتىر جىل سوڭىندا كاسپي تەڭىزىن زەرتتەيتىن ينستيتۋتتىڭ قاشان قۇرىلاتىنى بەلگىسىز بولىپ شىقتى.
سونداي-اق بالىق شارۋاشىلىعى كوميتەتى يتبالىقتاردىڭ قۇرلىققا شىعىپ كەتۋىن ءتۇسىندىردى.
