كاسىپ اشۋ ماقساتىندا نەسيە الۋعا بولا ما؟
استانا. KAZINFORM - بيزنەس جاساۋ ماقساتىندا كرەديت الۋعا بولا ما؟ ق م د ب وكىلدەرى بۇل سۇراققا جاۋاپ بەردى.
«شاريعاتىمىزدا وسىمگە، ياعني نەسيەگە تىيىم سالىنعان. ول ۇستەمە اقشامەن بەرۋ بولعاندىقتان، كەسىمدى تۇردە ارام بولادى. ونىڭ ارام ەكەنى اللانىڭ كىتابىندا، پايعامبارىمىزدىڭ سۇننەتىندە دە باياندالعان ءارى بارلىق عالىم ءبىراۋىزدان ونىڭ ارام ەكەنىنە كەلىسكەن»، - دەلىنگەن جاۋاپتا.
ق م د ب وكىلدەرىنىڭ ايتۋىنشا، قۇراندا «اللا تاعالا ساۋدا-ساتتىقتى ادال، ال ءوسىمدى ارام ەتتى»، - دەلىنگەن.
«جابيردەن جەتكەن حاديستە پايعامبارىمىز «ءوسىم جەۋشىنى، جەگىزۋشىنى، كەلىسىمدى جازۋشىنى، وعان كۋاگەر بولعانداردى لاعىنەتتەدى جانە «ولاردىڭ ءبارى كۇنادا بىردەي» دەگەن. سوندىقتان مۇسىلمان ادام ەشقانداي زارۋلىك بولماسا، پايىزعا جولاماۋى، بىلمەستىكپەن الىپ قويعان جاعدايدا اللاعا شىنايى ءتاۋبا ەتۋى كەرەك. ريزىق - اللادان. ادام ءوزىنىڭ ريزىعىن ىزدەگەنىندەي، ريزىعى دا ءوز يەسىن ىزدەيدى. ول قاي جەردە بولماسىن، ونى اجالى ىزدەپ تاپقانىنداي، ريزىق ونى ىزدەپ تابادى. ءجابير يبن ابدۋللادان جەتكەن حاديستە پايعامبارىمىز بىلاي دەدى: «ۋا، ادامدار! ريزىقتارىڭدى تالاپ ەتۋدە كوركەمدىك تانىتىڭدار. ويتكەنى ادام ونى تولىق الماي، بۇل دۇنيەدەن وتپەيدى. اللادان قورقىپ، ونى تالاپ ەتۋدە دۇرىس جول ىزدەڭدەر. ادال بولعانىن الىپ، ارام بولعانىن تاستاڭدار»، - دەلىنگەن جاۋاپتا.
قورىتا ايتقاندا، قۇراندا، حاديستە ايتىلعانداي، كرەديت الۋ كۇنا ىسكە جاتادى. ادام دۇنيەگە كەلمەي جاتىپ اناسىنىڭ ىشىندە بولعاندا ونىڭ ريزىق، نەسىبەسى جازىلادى. سوندىقتان تاعدىرىنا جازىلعان ريزىقتى ىزدەۋدە مۇسىلمان ادام شاريعاتقا ساي، ادال جولدى ىزدەۋى كەرەك.
