كاسسا جاقسى بولسا، قازاق تىلىندەگى فيلمدەر كوبەيەدى - رەجيسسەر
الماتى. KAZINFORM - الماتىدا قازاق تىلىنە دۋبلياجدالعان Disney ستۋدياسىنىڭ «موانا 2» انيماتسيالىق فيلمىنىڭ جابىق كورسەتىلىمى بولدى.
Disney ستۋدياسى بيىل «ويجۇمباق 2»، «موانا 2»، «مۋفاسا. ارىستان پاتشا» دەپ اتالاتىن ءۇش فيلمىن قازاق تىلىنە اۋدارۋعا تاپسىرىس بەرىپ، دۋبلياج جۇمىستارىن قارجىلاندىردى. «ويجۇمباق 2» انيماتسيالىق فيلمى بيىل 13-ماۋسىم كۇنى قالىڭ كورەرمەنگە جول تارتتى. ەندى قازاقستاندىق كورەرمەن «موانا 2» تۋىندىسىن قازاقشا تاماشالاي الادى.
انيماتسيالىق فيلمنىڭ قازاق جانە ورىس تىلدەرىندەگى دۋبلياج رەجيسسەرى بولعان شاح-مۇرات وردابايەۆ قازاق تىلىندەگى فيلمدەر ءتىل بولاشاعىنا وڭ اسەر ەتەتىن ايتتى.
«انيماتسيا - ادامنىڭ جان-دۇنيەسىن قۋانتۋعا جارالعان نارسە عوي. سوندىقتان ءبىزدىڭ شىعارماشىلىق قۇرامىمىز بۇل جۇمىستان ءلاززات الدىق. كورەرمەنگە تۇسىنىكتى، قولجەتىمدى بولۋ ءۇشىن بار كۇش- جىگەرىمىزدى سالدىق. قازاق دۋلبياجىنىڭ بولاشاعى بار. ءتىل بىزگە عانا كەرەك. سوندىقتان بيلەت وتپەي جاتىر ەكەن، سەانس ازايىپ جاتىر ەكەن دەپ بۇل جۇمىستى توقتاتۋعا حاقىمىز جوق. ويتكەنى وسىنداي قادامدار ارقىلى ءبىز ءتىلىمىزدىڭ كەلەشەگىن وزگەرتە الامىز»، - دەدى ول.
شاح-مۇرات وردابايەۆتىڭ ايتۋىنشا، بيىل قازاق تىلىندە كورسەتىلەتىن Disney-دىڭ ءۇش فيلمى جاقسى تابىس جيناسا، كەلەسى جىلى قازاقشا دىبىستالاتىن فيلمدەردىڭ سانى كوبەيۋى مۇمكىن. سونداي-اق، ول قازاق دۋبلياجىنىڭ دەڭگەيى تۋرالى پىكىر ءبىلدىردى.
«ءاربىر جاڭا جوبا بۇرىنعىعا قاراعاندا قىزىعىراق ءارى قيىنىراق بولادى. جوبالاردىڭ ارقاسىندا ءبىزدىڭ دە بىلىكتىلىگىمىز وسەدى. مىسالى، «ويجۇمباق» وزىنشە كۇردەلى بولسا، «موانا» ودان ەسەلى كۇردەلى. ويتكەنى اندەرى بار. وسى دۋبلياجعا ارنايى اقىن اعامىزدى شاقىردىق. 5 جىل بۇرىنعىمەن سالىستىرساق، ءقازىر اجەپتەۋىر وستىك. ءبىراق مۇنىڭ شەكتەۋى جوق»، - دەدى فيلمنىڭ دۋبلياج رەجيسسەرى.
ال فيلمنىڭ باستى كەيىپكەرى - موانانى قازاق تىلىندە دىبىستاعان قۇرالاي وتەپوۆا دۋبلياج جۇمىستارىنىڭ ەرەكشەلىكتەرىنە توقتالدى.
«مەن مۋزىكالىق دراما تەاترىنىڭ ءارتىسىمىن. وسىعان دەيىن «ويجۇمباق» تۋىندىسىندا قىزعانىش كەيىپكەرىن دىبىستادىم. موانا - مەن ءۇشىن دۋبلياجداعى ەكىنشى تاجىريبە. دىبىستاۋعا 1 اپتاداي ۋاقىت كەتتى. رەجيسسەرمەن تىعىز بايلانىستا بولدىق. سەبەبى قازاق ءتىلى ءبارىبىر دە وزگە. سوندىقتان ءوزىمىزدىڭ ەلەمەنتتەرىمىزدى قوسقان تۇستار دا بولدى»، - دەدى قۇرالاي وتەپوۆا.
ەسكە سالايىق، بۇعان دەيىن قازاق تىلىندەگى فيلمدەرگە سۇرانىس ارتىپ كەلە جاتقانىن جازعانبىز.
اۆتور
دوسبول اتاجان
