كارىم ءماسىموۆ پەن ونىڭ بۇرىنعى ورىنباسارلارى قازىر قايدا؟

ۇلتتىق قاۋىپسىزدىك كوميتەتى كارىم ءماسىموۆ پەن ونىڭ بۇرىنعى ورىنباسارلارى قايدا ەكەنىن ايتتى.

Tengrinews.kz رەداكسياسىنىڭ رەسمي ساۋالىنا بەرگەن جاۋابىندا ۇلتتىق قاۋىپسىزدىك كوميتەتى سىبايلاس جەمقورلىققا قارسى قىزمەتتىڭ قاۋلىسى نەگىزىندە پروكۋراتۋرانىڭ سانكسياسىمەن كارىم ءماسىموۆ پەن داۋلەت ەرعوجين قىلمىستىق ءىس بويىنشا استاناداعى ۇ ق ك تەرگەۋ يزولياتورىندا قاماۋدا وتىرعانىن حابارلادى. ءىس تەرگەلۋدە.

ءوز كەزەگىندە ءانۋار سادىقۇلوۆ پەن مارات وسيپوۆتى ۇستاۋ ورىندارى تۋرالى اقپارات ىشكى ىستەر مينيسترلىگىنىڭ قۇزىرىندا، دەپ حابارلادى ۇلتتىق قاۋىپسىزدىك كوميتەتى.

ەسكە سالايىق، 2023-جىلى 24-ساۋىردە استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتى ق ر ۇلتتىق قاۋىپسىزدىك كوميتەتىنىڭ ەكس-ءتوراعاسى كارىم ماسىموۆكە، ۇلتتىق قاۋىپسىزدىك كوميتەتى ءتوراعاسىنىڭ ەكس-ورىنباسارلارى ءانۋار سادىقۇلوۆ، داۋلەت ەرعوجين، مارات وسيپوۆكە قاتىستى قىلمىستىق ءىس بويىنشا ۇكىم شىعارعان بولاتىن.

سوت ءىستى «اسا قۇپيا» دەگەن بەلگىمەن قارادى. كارىم ءماسىموۆ ق ر قىلمىستىق كودەكسىنىڭ 175-بابىنىڭ 1-بولىگى، 179-بابىنىڭ 3-بولىگى، 362-بابىنىڭ 4-بولىگىنىڭ 3-تارماعى بويىنشا كىنالى دەپ تانىلىپ، 18 جىل باس بوستاندىعىنان ايىرىلدى. سونىمەن بىرگە مەملەكەتتىك قىزمەتتە ءومىر بويى قىزمەت ەتە المايدى جانە مۇلكى تاركىلەنەدى.

كارىم ءماسىموۆ بۇعان قوسا، گەنەرال شەنى مەن مەملەكەتتىك ناگرادالارىنان ايىرىلدى.