كارىم ءماسىموۆ اقشا جىمقىردى جانە اسا ءىرى كولەمدە پارا الدى دەگەن كۇدىككە ءىلىندى

ۇلتتىق قاۋىپسىزدىك كوميتەتى Kazinform اگەنتتىگىنە كارىم ماسىموۆكە قاتىستى جاڭا قىلمىستىق ىستەر تەرگەلىپ جاتقانىن حابارلادى.

- كارىم ماسىموۆكە قاتىستى ق ر ق ك 218-بابى «قىلمىستىق جولمەن الىنعان اقشانى جانە (نەمەسە) وزگە مۇلىكتى زاڭداستىرۋ (جىلىستاتۋ) » جانە 366-بابى «اسا ءىرى كولەمدە پارا الۋ» بويىنشا سوتقا دەيىنگى تەرگەۋ ءجۇرىپ جاتىر»، - دەلىنگەن ق ر ۇ ق ك ساۋالعا جاۋابىندا.

سول سەبەپتى قىلمىستىق- اتقارۋ كودەكسىنىڭ 92-بابى، 3-بولىگى بويىنشا كارىم ءماسىموۆ پروكۋراتۋرا سانكسياسىنان قىلمىستىق ءىس اياسىندا تەرگەۋ امالدارىن جۇرگىزۋ ماقساتىندا استانا قالاسى ۇ ق ك تەرگەۋ يزولياتورىندا قالدى.

بۇعان دەيىن ك. ءماسىموۆ پەن ا. سادىقۇلوۆقا مەملەكەتكە وپاسىزدىق جاساۋ، بيلىكتى كۇشپەن باسىپ الۋ، بيلىك پەن لاۋازىمدىق وكىلەتتىگىن اسىرا پايدالانۋ، د. ەرعوجينگە بيلىكتى كۇشپەن باسىپ الۋ، بيلىك پەن لاۋازىمدىق وكىلەتتىگىن اسىرا پايدالانۋ، م. وسيپوۆكە بيلىك پەن لاۋازىمدىق وكىلەتتىگىن اسىرا پايدالانۋ ايىبى تاعىلعان.

2023 -جىلدىڭ 10- ناۋرىزىندا ۇ ق ك باسپا ءسوز قىزمەتى ءماسىموۆ پرەمەر- مينيستر بولعان كەزدە بيزنەس- قۇرىلىمداردىڭ بىرىنەن قۇنى 2,5 ميلليارد تەڭگە بولاتىن استانادان ساۋلەتتى قوناقۇي مەن جەر تەلىمىن العانىنا قاتىستى تەرگەۋ ءجۇرىپ جاتقانىن حابارلادى.

2023 -جىلدىڭ 24 -ساۋىرىندە استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ماسىموۆكە جانە ونىڭ ورىنباسارلارى ا. سادىقۇلوۆقا، د. ەرعوجينگە، م. وسيپوۆكە قاتىستى قىلمىستىق ءىس بويىنشا ۇكىمىن جاريا ەتتى.

ك. ءماسىموۆ – 18، ا. سادىقۇلوۆ - 16 جىلعا، د. ەرعوجين تاعىلعان ايىپتارعا سايكەس - 15 جىلعا، م. وسيپوۆ بولسا بيلىك پەن لاۋازىمدىق وكىلەتتىگىن اسىرا پايدالانۋ بابىمەن 3 جىلعا باس بوستاندىعىنان ايىرىلدى. سوتتالۋشىلاردىڭ بارلىعى ءومىر بويى مەملەكەتتىك قىزمەتتە لاۋازىم يەلەنە المايدى. سونىمەن قاتار بارلىعى گەنەرال شەندەرىنەن جانە مەملەكەتتىك ناگرادالارىنان ايىرىلدى.

مۇنان بولەك، سوتتالۋشىلاردان مەملەكەت كىرىسىنە 10 ميلليارد تەڭگەدەن استام قارجى جانە 24 ميلليون ا ق ش دوللارى ءوندىرىپ الىندى.

اۆتور

بالنۇر قوجاگەلدى