كارتوپ باعاسى قاشان تومەندەيدى

استانا. KAZINFORM - پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين كارتوپ باعاسىنا قاتىستى تۇسىنىك بەردى.

- سۇرانىس پەن ۇسىنىس زاڭدىلىعى بار. وسىعان دەيىن بەلارۋستە دە، رەسەي فەدەراتسياسىندا دا، وزبەكستاندا دا كارتوپ جاقسى وسپەگەن. ال قازاقستاندا بىلتىر ايتارلىقتاي جاقسى قور قالىپتاسقان ەدى. بۇل رەتتە، فەرمەرلەر وسى ونىمنەن جاقسى تابىس العىسى كەلدى، ياعني بەلگىلى ءبىر ۋاقىتقا دەيىن كارتوپتى ەكسپورتتاۋعا شەكتەۋ قويمادىق. شىن مانىندە، بىزدە كارتوپ تاپشىلىعى جوق. ءبىراق باعاسى ءوستى. بىزدە ەكى جول بار. ءبىرىنشىسى - كارتوپتىڭ باعاسىن شەكتەۋ، وندا ونى بيىل ەشكىم ەكپەۋى مۇمكىن جانە كەلەسى جىلى تاپشىلىققا تاپ بولامىز. ەكىنشى جولى - كارتوپ ەكسپورتىن شەكتەۋ. ءبىز وسى قادامعا بارۋعا ءماجبۇر بولدىق. ءبىز باعانى شەكتەمەدىك، ويتكەنى بۇل تەتىك نارىق تالاپتارىنا ساي كەلمەيدى، - دەدى س. جۇمانعارين پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، قازىر كارتوپتىڭ كەلىسى 400-600 تەڭگە ارالىعىندا. سونىمەن قاتار، تۇركىستان وبلىسىندا شىققان كارتوپتىڭ بيىلعى جاڭا ءونىمى ەگىس القاپتارىندا 200-300 تەڭگە شاماسىندا.

- مەنىڭ ويىمشا، قازىر وسى ءونىمنىڭ باعاسى تۇراقتالا باستايدى. مۇنىمەن قوسا، استانادا 50 كونتەينەر ءتۇسىرىلىپ جاتىر. جالپى، دۇكەن سورەلەرىندە كارتوپ بولماعان كەزدەر بايقالمادى، - دەدى ۆيتسە-پرەمەر.